Agjencia Amerikane e Hapësirës (NASA) ka zgjedhur 13 vende të mundshme për uljen në Hënë dhe vendosjen e një pranie afatgjate në sipërfaqen hënore.

Qëllimi i NASA-s është të kthejë astronautët në Hënë deri në vitin 2025, dhe zonat e mundshme të uljes ndodhen pranë polit jugor hënor.

"Përzgjedhja e këtyre rajoneve do të thotë se jemi një hap gjigant më afër kthimit të njerëzve në Hënë për herë të parë që nga misionet Apollo", tha Mark Kirasich, një nga administratorët e programit Artemis. Hera e fundit që njeriu ishte në sipërfaqen e Hënës ishte në vitin 1972.

Kirasich theksoi se misioni nga programi Artemis "do të jetë i ndryshëm nga të gjithë të mëparshmit" sepse astronautët do të gjenden në pjesë të errëta dhe të paeksploruara më parë të Hënës dhe do të hedhin themelet për qëndrime më të gjata në të ardhmen.

Madhësia e secilit vend është 15 x 15 kilometra, dhe ato janë të vendosura brenda gjashtë shkallëve të gjerësisë gjeografike të polit jugor në Hënë dhe kanë karakteristika të ndryshme gjeologjike.

Sipas Jacob Bleacher, shkencëtar kryesor kërkimor në selinë e NASA-s, çdo rajon ka të paktën 10 vende të mundshme uljeje.

Kur NASA po zgjidhte zonat e uljes, shkencëtarët dhe inxhinierët u mbështetën në të dhënat e mbledhura nga Lunar Reconnaissance Orbiter, një anije kozmike pa pilot që tani rrotullohet rreth Hënës, dhe të dhënat e mbledhura gjatë dekadave. Rajonet u zgjodhën duke marrë parasysh shumë aspekte, duke përfshirë kohën e nisjes, shanset për një ulje të sigurt, pjerrësinë e terrenit, lehtësinë e komunikimit me Tokën dhe kushtet e ndriçimit.

Të 13 vendet ofrojnë ndriçim të vazhdueshëm për një periudhë prej 6.5 ditësh, që është kohëzgjatja e planifikuar e misionit Artemis III në Hënë. Drita e diellit është thelbësore për një qëndrim afatgjatë në sipërfaqen hënore, sepse shërben si burim energjie dhe minimizon luhatjet e temperaturës.

NASA planifikon të dërgojë astronautë në Hënë duke përdorur sistemin Starship të zhvilluar nga SpaceX. Misioni i parë orbital i sistemit është planifikuar për këtë vit./Motilokal.com

Credits: NASA