Të paktën tre persona kanë vdekur dhe katër të tjerë janë lënduar nga cikloni tropikal Ma-on, i cili goditi ishullin Luzon, njoftuan sot autoritetet filipinase.

Sipas vlerësimeve të autoriteteve, rreth 50 mijë njerëz janë prekur nga cikloni në 400 fshatra të ishullit. Me erëra deri në 150 km/h, cikloni tropikal përmbyti rrugët, shkatërroi shtëpi dhe këputi kabllot e energjisë dhe telekomunikacionit.

Presidenti i Filipineve Ferdinand Marcos Jr. kishte urdhëruar mbylljen e shkollave dhe zyrave qeveritare në kryeqytetin Manila dhe gjashtë provinca të tjera të martën dhe të mërkurën për shkak të kërcënimit të tajfunit Ma-on. Megjithatë, siç shihet nga fotot e Reuters, nxënësit kanë vijuar normalisht mësimin në shkollë në klasa të përmbytura.

Ciklonet janë të zakonshme në Filipine

Ky ishte cikloni i gjashtë tropikal që goditi vendin e Azisë Juglindore këtë vit. Filipinet janë një nga vendet më të cenueshme në botë ndaj fatkeqësive natyrore, kryesisht për shkak të vendndodhjes së saj në të ashtuquajturën "Unaza e Zjarrit" në Paqësor dhe tajfuneve të fuqishëm që goditën rajonin.

Mesatarisht, arkipelagu i Filipineve përballet me 20 tajfunë çdo vit, disa prej të cilëve janë të fuqishëm dhe shkatërrues.

Prillin e kaluar, stuhia tropikale Maggie shkaktoi përmbytje dhe rrëshqitje të dheut në Filipine, duke lënë 224 të vdekur dhe 147 të zhdukur./Motilokal.com