Bota ka nevojë për më shumë naftë dhe gaz tani për t'u përballur me mungesën e energjisë, ndërkohë që po shtyhet drejt tranzicionit të furnizimeve me energji të rinovueshme, tha shefi ekzekutiv i Tesla Inc. Elon Musk.

"Në këtë kohë, ne në fakt kemi nevojë për më shumë naftë dhe gaz, jo më pak", tha Musk të hënën gjatë një konference energjetike në Norvegji, duke shtuar se ai nuk është dikush për të "demonizuar" karburantet fosile. Në të njëjtën kohë, “ne duhet të kemi një rrugë të qartë drejt një të ardhmeje të qëndrueshme energjetike”.

Musk i bëri këto komente pasi që Evropa po përballet me krizën e saj më të keqe energjetike në dekada pasi Rusia po ul furnizimet me gaz natyror.

Politikanët evropianë kanë ndarë tashmë rreth 280 miliardë euro për të lehtësuar krizën e rritjes së çmimeve për bizneset dhe konsumatorët, por ndihma rrezikon të zbehet nga përmasat e krizës.

Bashkimi Evropian do të thërrasë një takim urgjent të ministrave të energjisë për të diskutuar zgjidhjet në mbarë bllokun.

Musk tha se era e oqeanit ka "potencial masiv të pashfrytëzuar" dhe shtoi se ai është një ithtar i energjisë bërthamore.

"Nëse keni një central bërthamor të projektuar mirë, nuk duhet ta mbyllni atë veçanërisht tani", tha ai.

Tesla prodhon produkte duke përfshirë makina elektrike, çati diellore dhe bateri që kontribuojnë në dekarbonizimin e sektorëve të transportit dhe energjisë./Motilokal.com