Ministrja  e Turizmit dhe Mjedisit, Mirela Kumbaro, u shpreh sot pas mbledhjes së qeverisë se ministria po përgatitet për sezonin e ardhshëm veror.

Ajo bëri me dije se në mbledhjen e sotme, qeveria miratoi ndryshimin e kufirit minimal të stacioneve të plazheve publike, që do të përdoren nga bashkitë.

“Qeveria po përgatitet për sezonin e ardhshëm veror në një kohë rekord si asnjëherë më parë. Kaluam vendimin e KM për disa ndryshime në rregulloren e menaxhimit të stacioneve të plazhit, sepse nuk do të mendojmë për plazhin kur pushuesit mendojnë plazhin, por të mendojmë më përpara në mënyrë që sezoni i ardhshëm të jetë  më i mirë”, u shpreh Kumbaro.

Kumbaro tha se ndonëse këtë vit në total 50% e parcelave të plazheve të parashikuara nga bashkitë bregdetare ishin publike, minimumi ligjor ishte 20%, ne e ngritëm në 30% me vendimin e sotëm”.

Sipas Kumbaros, kontratat e lidhura do të vazhdojnë të jenë të vlefshme edhe për vitin tjetër dhe për kohëzgjatjen e lidhur.

“Nga këto kontrata që kanë vlerë për pushtetin vendor mjafton të përmendim faktin që 208 milionë lekë u mblodhën nga bashkitë në vitin 2019 dhe 505 milionë lekë janë mbledhur të ardhura nga sistemi i menaxhimit të plazheve për vitin 2022. Janë të domosdoshme edhe për të siguruar funksionimin e bizneseve private, por edhe për të garantuar monitorim, mirëmbajtje, pastrim. Nga ana tjetër do të futen për vitin që vjen dy masa shumë të rëndësishme që kanë të bëjnë me turizmin detar”, nënvizoi Kumbaro.

Ministrja Kumbaro u shpreh se “për herë të parë fillojnë stacionet e ankorimit dhe bregëzimit për mjetet lundruese”.

“Për vitin që vjen aplikimet në sistemin online për stacionet e plazhit fillojnë më datën 1 nëntor. I gjithë procesi i përgatitjes së sezonit të ardhshëm do të kryhet brenda vjeshtës së vitit 2022”, tha Kumbaro.

/Motilokal.com