Porsche njoftoi se ka nisur në një fabrikë pilot në Kili prodhimin e karburanteve elektrikë që mund të shërbejnë si lëndë djegëse alternative për motorët me djegie në mbarë botën.

Të njohura gjithashtu si lëndë djegëse sintetike, "e-karburantet e prodhuara nga uji dhe dioksidi i karbonit duke përdorur energjinë e erës mundësojnë funksionimin pothuajse neutral ndaj CO2 të motorëve me benzinë", tha prodhuesi gjerman i veturave.

"Potenciali i e-karburanteve është i madh. Aktualisht ka më shumë se 1.3 miliard automjete me motorë me djegie në mbarë botën. Shumë prej tyre do të jenë në rrugë për dekadat e ardhshme, dhe e-karburant u ofron pronarëve të veturave ekzistuese një alternativë pothuajse neutrale ndaj karbonit", tha Michael Steiner, anëtar i Bordit Ekzekutiv për Zhvillim dhe Kërkim në Porsche AG.

Jugu i Kilit u zgjodh për kushtet e tij ideale për të prodhuar e-karburant me erë që fryn rreth 270 ditë në vit që u mundëson turbinave të erës të funksionojnë me kapacitet të plotë, sipas kompanisë.

Një mbushje ceremoniale me karburant të një Porsche 911 me karburantin e parë sintetik të prodhuar u krye në fabrikën pilot Haru Oni në Punta Arenas, Kili ndërsa u hap zyrtarisht në prani të ministrit kilian të Energjisë Diego Pardow.

"Përdorimi i e-karburant redukton emetimet e CO2. Duke parë të gjithë sektorin e trafikut, prodhimi industrial i karburanteve sintetike duhet të vazhdojë të shtyhet përpara në mbarë botën", tha Barbara Frenkel, anëtare e Bordit Ekzekutiv për Prokurimin në Porsche AG.

Kompania planifikon të prodhojë 130 mijë litra e-karburant çdo vit në fazën pilot, fillimisht për ta përdorur atë në projekte më specifike si Porsche Mobil 1 Supercup dhe në Porsche Experience Centers.

Pas fazës pilot, projekti në Kili synon të prodhojë 55 milionë litra në vit deri në mes të dekadës, me kapacitet të rritur në 550 milionë litra në dy vjet.

/Motilokal.com