Parlamenti Evropian miratoi zyrtarisht sot (e marte) një ligj për të ndaluar efektivisht shitjen e veturave të reja me benzinë dhe naftë në Bashkimin Evropian nga viti 2035, duke synuar të përshpejtojë kalimin në automjete elektrike dhe të luftojë ndryshimet klimatike.

Rregullat historike do të kërkojnë që deri në vitin 2035 prodhuesit e veturave duhet të arrijnë një ulje 100% të emetimeve të CO2 nga veturat e reja të shitura, gjë që do ta bënte të pamundur shitjen e automjeteve të reja me karburant fosile në bllokun 27-vendesh.

Ligji do të vendosë gjithashtu një ulje prej 55% në emetimet e CO2 për veturat e reja të shitura nga viti 2030 kundrejt niveleve të vitit 2021, shumë më e lartë se objektivi ekzistues prej 37.5%.

"Kostot e funksionimit të një automjeti elektrik janë tashmë më të ulëta se kostot operative të një automjeti me një motor me djegie të brendshme", tha Jan Huitema, negociatori kryesor i parlamentit për rregullat, duke shtuar se ishte thelbësore të silleshin automjete elektrike më të përballueshme në konsumatorët.

Vendet e BE-së ranë dakord për marrëveshjen me ligjvënësit tetorin e kaluar, por ende duhet të vendosin zyrtarisht rregullat përpara se ato të hyjnë në fuqi. Miratimi përfundimtar pritet në mars.

Furgonët e rinj duhet të jenë në përputhje me një ulje prej 100% të CO2 deri në vitin 2035 dhe një ulje prej 50% deri në vitin 2030, krahasuar me nivelet e vitit 2021.

Shumë prodhues veturash në Evropë kanë paralajmëruar investime në elektrifikim.

Shefi ekzekutiv i Volkswagen Thomas Schaefer tha vitin e kaluar se nga viti 2033 marka do të prodhojë vetëm vetura elektrike në Evropë.

Megjithatë, ligji i BE-së hasi rezistencë nga disa industri dhe vende kur u propozua në korrik të vitit 2021. Si rezultat, marrëveshja përfundimtare përfshin disa fleksibilitete, duke përfshirë atë që prodhuesit e vegjël të veturave që prodhojnë më pak se 10,000 automjete në vit mund të negociojnë objektiva më të dobët deri në vitin 2036.

Ligji i CO2 i veturave është pjesë e një pakete më të gjerë të politikave më të ashpra të klimës së BE-së, e krijuar për të përmbushur objektivat e bllokut për të ulur emetimet e gazrave serrë këtë dekadë.

/Motilokal.com