Lumenjtë dhe liqenet në Itali po përballen me një tjetër vit thatësire të madhe pas një dimri me pak reshje shiu dhe bore, duke ngritur alarmin për implikime në bujqësi, hidrocentrale dhe aksesin në ujë të pijshëm.

Zonat e gjera të Po, lumi më i gjatë i vendit që ushqen disa rajone veriore dhe qendrore, janë tashmë të thara, ndërsa niveli i ujit në liqenin Garda është më i ulëti gjatë dimrit në 35 vjet.

Nivelet e ulëta të pazakonta të ujit në Venecia kanë tharë kanalet e qytetit lagunor, duke lënë gondolat të bllokuara.

Këshilli Kombëtar i Kërkimeve të Italisë (CNR) tha se reshjet në veri ishin ulur me 40% në vitin 2022 dhe mungesa e reshjeve që nga fillimi i vitit 2023 ishte e konsiderueshme.

Në veçanti, Po, i cili shtrihet nga Alpet në veri-perëndim dhe rrjedh nëpër deltën e Po para se të arrijë në Adriatik, përballet me një përsëritje të thatësirës së vitit të kaluar, më e keqja që ka prekur rrugën ujore në shtatë dekada.

“Asgjë nuk ka ndryshuar që nga viti 2022”, tha Luca Mercalli, presidenti i Shoqatës Italiane Meteorologjike. “Jemi ende në një situatë deficiti… le të presim pranverën, e cila zakonisht është periudha më me shi për luginën e Po. Ekziston një mundësi e mirë që reshjet në prill dhe maj mund të kompensojnë, kjo është shpresa e fundit. Nëse nuk kemi shi pranveror për dy vite radhazi, atëherë do të ishte hera e parë që do të ndodhte ndonjëherë.”

Po gjithashtu rrjedh përmes Emilia-Romagna dhe Veneto, një nga zonat më të rëndësishme bujqësore në Evropë .

Coldiretti, shoqata më e madhe e fermerëve në Itali, tha se thatësira e vitit 2022 shkaktoi dëme në vlerë prej 6 miliardë eurosh në prodhimet bujqësore. Ata paralajmëruan se një e treta e prodhimit është në rrezik këtë vit nëse nuk shmangej një thatësirë tjetër e gjatë dhe e rëndë.

Alessandro Bratti, presidenti i autoritetit të basenit Po, tha se situata ishte më ekstreme në Piemonte dhe Lombardi, ndërsa në Trentino po ndikonte në prodhimin e energjisë hidroelektrike.

"Nëse nuk keni ujë, nuk mund të prodhoni energji, kështu që ky është një problem tjetër", tha Bratti.

Korrikun e vitit të kaluar, Italia shpalli gjendjen e jashtëzakonshme në zonat rreth lumit Po, aty ku është gati një e treta e bujqësisë së vendit. Thatësira e verës së kaluar u vlerësua si më e keqja e 70 viteve të fundit.

Aktualisht, Evropa Perëndimore po kalon një mot me temperatura të larta, jo të zakonshme për këtë periudhë të vitit. Megjithatë, meteorologët kanë parashikuar që në ditët në vijim do të ketë rikthim të reshjeve të dëborës në Alpe.

/Motilokal.com