Kur pimë një gotë ujë, shkruajmë në fletore, marrim ilaçe për temperaturën ose ndërtojmë një shtëpi, jo gjithmonë e bëjmë lidhjen me pyjet. E megjithatë, këto dhe shumë aspekte të tjera të jetës sonë janë të lidhura me pyjet në një mënyrë ose në një tjetër.

Menaxhimi i qëndrueshëm i pyjeve dhe përdorimi i burimeve të tyre janë çelësi për të luftuar ndryshimet klimatike dhe për të kontribuar në prosperitetin dhe mirëqenien e brezave aktualë dhe të ardhshëm. Pyjet gjithashtu luajnë një rol vendimtar në zbutjen e varfërisë dhe në arritjen e Objektivave të Zhvillimit të Qëndrueshëm (SDGs). Megjithatë, pavarësisht nga të gjitha këto përfitime të paçmueshme ekologjike, ekonomike, sociale dhe shëndetësore, pyjet janë të rrezikuara nga zjarret, dëmtuesit, thatësirat dhe shpyllëzimi i paparë.

Tema e vitit 2023 është " Pyjet dhe shëndeti ".

Pyjet na japin shumë për shëndetin tonë. Ato pastrojnë ujin, pastrojnë ajrin, thithin karbonin për të luftuar ndryshimet klimatike, ofrojnë ushqim dhe ilaçe që shpëtojnë jetën dhe përmirësojnë mirëqenien tonë.

Na takon ne t'i mbrojmë këto burime të çmuara natyrore.

Ky viti kërkon të japësh, jo vetëm të marrësh, sepse pyjet e shëndetshme do të sjellin njerëz të shëndetshëm.

Asambleja e Përgjithshme e Kombeve të Bashkuara shpalli 21 Marsin Ditën Ndërkombëtare të Pyjeve në vitin 2012 për të festuar dhe rritur ndërgjegjësimin për rëndësinë e të gjitha llojeve të pyjeve. Vendet inkurajohen të ndërmarrin përpjekje lokale, kombëtare dhe ndërkombëtare për të organizuar aktivitete që përfshijnë pyje dhe pemë, të tilla si fushatat e mbjelljes së pemëve.

Organizatorët janë Forumi i Kombeve të Bashkuara për Pyjet dhe Organizata e Kombeve të Bashkuara për Ushqimin dhe Bujqësinë (FAO), në bashkëpunim me qeveritë, Partneritetin Bashkëpunues për Pyjet dhe organizata të tjera përkatëse në këtë fushë.

Kosova llogaritet ndër vendet e pasura me sipërfaqe pyjore. Sipas Agjencisë së Statistikave të Kosovës (ASK) në publikimin e raportit “Disa Fakte mbi Mjedisin”, tregon se pyjet e Kosovës janë të ndara në pyje të larta, pyje të ulëta, shkurre dhe pyje të degraduara. Pjesën më të madhe të pyjeve të Kosovës e përbejnë pyjet e ulëta (42 %), ndërsa pjesën më të vogël e përbejnë pyjet e larta (15 %).

Sipas ASK-së inventarizimit kombëtar të pyjeve që është realizuar në vitin 2003, është vlerësuar se sipërfaqja totale pyjore është 464,800 ha apo 42% e sipërfaqes së përgjithshme të Kosovës. Rreth 278,880 ha janë toka pyjore në pronësi publike, që menaxhohen nga Agjencioni Pyjor i Kosovës (APK), dhe është e organizuar në gjashtë rajone gjeografike. Pyjet gjetherënëse përfaqësojnë 90 % të pyjeve të Kosovës dhe janë të dominuar nga dushqet dhe ahu, kurse pyjet halore mbulojnë rreth 7 % te pyjeve dhe janë të dominuar nga pisha, bredhi dhe hermoqi. Sipas të dhënave të vitit 2020 gjithsej sipërfaqja pyjore është 481,000 ha.

/Motilokal.com