Shqipëria po kthehet gjithnjë e më shumë në një destinacion mjaft të preferuar të turistëve të huaj, por edhe në një vend mjaft të rekomanduar nga mediat botërore, të cilat shkruajnë për mrekullitë e saj natyrore, ushqimin dhe pasurinë historike.

Media prestigjoze amerikane, CNN ka renditur Shqipërinë mes 12 alternativave për t’u vizituar këtë verë, si destinacion turistik i qëndrueshëm, mes bregdetit fantastik, natyrës dhe trashëgimisë kulturore.

Shqipëria është renditur mes vendeve të mëdha turistike e si Italia, Spanja, Tajlanda etj. Duke vlerësuar bukuritë natyrore dhe mundësitë e jashtëzakonshme për eksplorim, CNN thekson se Shqipëria do të ofrojë plazhe mahnitëse të pacenuara.

“Shqipëria është një perlë mesdhetare që ka të ngjarë të jetë më pak e mbushur me njerëz këtë verë sesa Greqia dhe Kroacia, thotë Joao Donadel, një tjetër këshilltar i udhëtimeve në EMBARK Beyond. Ka një vijë bregdetare të mrekullueshme me plazhe të pacenuara; Butrinti, një sit i Trashëgimisë Botërore të UNESCO-s, plus mundësi për shëtitje, ecje dhe eksplorim të jashtëzakonshëm”, thuhet në shkrimin e CNN.

Shkrimin e CNN e ka shpërndarë në rrjetin social “Facebook” edhe kryeministri, Edi Rama, duke thënë se tashmë vendi ynë është një “perlë mesdhetare dhe këtë e thotë gjigandi mediatik botëror CNN që na rendit mes 12 alternativave për t’u vizituar këtë verë, si destinacion i turizmit të qëndrueshëm, mes bregdetit fantastik, natyrës dhe trashëgimisë kulturore, duke ofruar eksperiencën unike të pushimeve për vitin 2023”.

CNN nuk është media e parë prestigjoze që shkruan për Shqipërinë dhe bukuritë e saj natyrore, pasi prej kohësh media të vendeve të ndryshme zgjedhin të shkruajnë për vendin tonë.

/Motillokal.com