Zjarrfikësit po luftojnë me zjarret e mëdha në Tenerife. Kushtet e rënda të motit përkeqësuan flakët, duke detyruar mijëra të largohen nga shtëpitë e tyre në ishullin spanjoll të pushimeve.

Zjarri i madh shpërtheu të martën vonë në një zonë malore verilindore të ishullit, duke u shndërruar shpejt në zjarrin më të madh të Ishujve Kanarie.

Kreu i qeverisë së Tenrefife, Rosa Davila tha se “Është një zjarr shkatërrues, një shkallë që Ishujt Kanarie nuk e kanë përjetuar kurrë më parë.

Deri më tani, zjarri, i cili tani ka një perimetër prej 70 kilometrash, ka djegur 8,400 hektarë, ekuivalent me pak më shumë se 4.0 për qind të sipërfaqes së përgjithshme të Tenerife prej 203,400 hektarësh.

Në një përditësim vonë të shtunën, presidenti rajonal i Ishujve Kanarie, Fernando Clavijo tha se zjarri i pangopur deri më tani kishte zhvendosur “gjithsej 12,279 njerëz”.

Autoritetet nuk përjashtuan evakuime të mëtejshme, duke paralajmëruar për një natë të vështirë përpara.

Deri më tani zjarri ka prekur 11 komuna në Tenerife, më i madhi nga shtatë ishujt Kanarie.  Zjarri ka gjeneruar një shtyllë të madhe tymi që tani shtrihet rreth tetë kilometra në ajër, duke u ngritur shumë mbi majën e malit Teide, vullkani që ngrihet mbi ishull.

Kryeministri spanjoll Pedro Sanchez pritet të vizitojë ishullin të hënën.

Vitin e kaluar Spanja pësoi më shumë se 500 zjarre që shkatërruan më shumë se 300,000 hektarë, duke e bërë atë vendin më të goditur në Evropë, sipas Sistemit Evropian të Informacionit për Zjarret në Pyje (EFFIS).

/Motilokal.com