Qendra për Studimin dhe Ruajtjen e Shpendëve të Shqipërisë përmes një postimi në Facebook, ka njoftuar se individi i sqepbizës që u pajis me gjurmues satelitor në Lagunën e Nartës në javën e fundit të qershorit 2023, filloi shtegtimin javën e fundit të gushtit 2023, ku me një fluturim prej 6.5 orësh arriti në bregdetin lindor italian dhe u ndal në Kriporen Il Monte, ku qëndroi për afro 3 muaj, deri në javën e 2-të të nëntorit 2023.

“Më datë 11.11.2023 në orën 17:26, shpendi filloi fluturimin pandërprerë shtegtues drejt Afrikës. Në të njëjtën datë në 22:26, shpendi arriti në bregun perëndimor të Italisë dhe më pas vazhdoi të fluturonte drejt Sicilisë dhe arriti në Palermo të nesërmen në orën 06:26, pas një udhëtimi të gjatë prej 8 orësh. Sqepbiza nuk ndaloi në Sicili, por vazhdoi drejt Afrikës, ku më në fund u ndal në një liqen të cekët të kripur në afërsi të qytetit të Monastirit në Tunizi në orën 21:56, pas një fluturimi 28.5 orësh pa ndalesë”, thuhet në njoftim.

Këto rezultate janë shumë interesante, duke mos treguar vetëm aftësinë e këtij shpendi për të kryer fluturim aktiv për një kohë kaq të gjatë pa u ndalur, por edhe më interesante pasi tregojnë rrugën e shtegtimit.

/Motilokal.com