Stina e dimrit e cila karakterizohet nga i ftohti dhe temperaturat e ulëta është stina e cila mund të sjell probleme të shumta shëndetësore, prandaj duhet të kujdesemi në mënyrë që t’i shmangemi sëmundjeve dhe lëndimeve që mund të na kërcënojnë gjatë kësaj periudhe.

Ekspertët e IGJEO-s kanë përgatitur disa këshilla në prag të stinës së ftohtë të dimrit, kryesisht për sa i përket udhëtimit në kushtet e motit të ftohtë, borës, akullit dhe ngricës.

Gjatë dimrit kushtet atmosferike, si mjegulla, shiu, bora dhe akulli e vështirësojnë drejtimin e automjetit.

Për këto arsye, për të shmangur rreziqet gjatë lëvizjes me veturë është mirë që të respektohen kufijtë e shpejtësisë.

Ka disa tregues specifikë të cilët duhet të mbahen parasysh:

Informohuni për motin në zonën ku do shkoni përpara udhëtimit;

Nuk rekomandohet lëvizja pa zinxhirë;

Evitoni në maksimum lëvizjet në orët e vona, e sidomos natën.

Mjegulla e bën rrugën më të padukshme, ul shikueshmërinë dhe zvogëlon mundësinë e frenimit në asfalt. Në këto raste:

Ulni shpejtësinë;

Ruani distancën;

Mbani dritat gjithnjë ndezur.

Siguria gjatë udhëtimit duhet të jetë pjesë e kulturës sonë...

Në ditët me mot të keq e në kushte të vështira, u rekomandojmë drejtuesve të automjeteve respektimin e rregullave të qarkullimit rrugor, si e vetmja mundësi që shmang e parandalon aksidentet.

Nga KUJDESI ka vetëm dobi.

/Motilokal.com