Të paktën 100 elefantë kanë ngordhur në parkun më të madh kombëtar të Zimbabvesë pasi rezervuarët e ujit janë tharë, tha një grup ndërkombëtar për të drejtat e kafshëve. Fondi Ndërkombëtar për Mirëqenien e Kafshëve (IFAW) tha se një periudhë e zgjatur e thatësisë ka varfëruar rezervuarët dikur të bollshëm të ujit në Parkun Kombëtar Hwange, me 100 elefantë tashmë të vdekur nga mungesa e ujit dhe thatësira ekstreme.

Parku Kombëtar Hwange mbulon mbi 14,600 kilometra katrorë dhe është shtëpia e afërsisht 45,000 elefantëve. Pavarësisht se ka gjithsej 104 puse, autoritetet e Parkut Kombëtar theksojnë se ato nuk janë të mjaftueshme, duke i detyruar kafshët e egra të udhëtojnë në distanca të gjata në kërkim të ushqimit dhe ujit.

Shtatorin e kaluar, Autoriteti i Menaxhimit të Parqeve dhe Kafshëve të Egra të Zimbabvesë raportoi se shumë kafshë ishin zhvendosur nga Parku Kombëtar në Botsvanën fqinje në kërkim të ujit dhe ushqimit. Prandaj, vdekja "e parakohshme" e kafshëve duhet parë si pasojë e shkaqeve më të thella që ndikojnë në ruajtjen e burimeve natyrore të rajonit, ndër të cilat janë ndryshimet klimatike, thotë eksperti i IFAW, Phillip Kuvawoga.

Në vitin 2019, më shumë se 200 elefantë vdiqën në vendin e Afrikës jugore, sipas IFAW, duke theksuar se fenomeni po përsëritet. Zimbabve ka rreth 100,000 elefantë dhe është popullsia e dytë më e madhe e elefantëve në të gjithë botën.

/Motilokal.com