Kur keni lodhje kronike dhe dhimbje muskujsh, mungesa e vitaminës mund të mos jetë mendimi juaj i parë, por këto simptoma mund të lidhen me dietën tuaj.

Shenjat e mungesës së vitaminës mund të përfshijnë gjithçka, nga dhimbjet e deri te depresioni dhe ankthi. Vitaminat luajnë një rol kyç në të gjitha funksionet e trupit dhe nëse nuk i merrni mjaftueshëm ato në baza ditore, mund të prishin funksionimin normal dhe të shëndetshëm të trupit, shkruan livestrong.

Vitamina D

Vitamina D është më e njohur për ruajtjen e forcës së kockave dhe gjithashtu ruan një sistem të shëndetshëm imunitar dhe siguron funksionimin e duhur të muskujve.

Nuk është vetëm një lëndë ushqyese që e merrni me ushqim, por një hormon që trupi juaj, nëse ekspozohet mjaftueshëm ndaj diellit, mund ta prodhojë vetë.

Një raport i majit 2017 në revistën ‌ Reviews in Endokrine and Metabolic Disorders‌ e përshkroi mungesën e vitaminës D si "një problem shëndetësor pandemik dhe global, efektet e të cilit nuk duhen nënvlerësuar".

Sipas një raporti të revistës, mungesa e vitaminës D prek më shumë se një miliard njerëz në mbarë botën dhe mund të shkaktojë simptoma të pakëndshme si: dhimbje dhe dobësi muskulore, lodhje kronike, pagjumësi, depresion, ankth dhe rritje të shpeshtësisë së ftohjeve dhe infeksioneve.

Ajo shoqërohet edhe me probleme kronike shëndetësore, ndër të cilat veçohen: sëmundjet e zemrës, çrregullimet autoimune, kanceri, diabeti i tipit 2, çrregullimet neurologjike, kariesi dhe osteoporoza.

Si të merrni më shumë vitaminë D?

Edhe pse ju merrni pjesën më të madhe të vitaminës D nga dielli, burimet ushqimore të pasura me vitaminë D përfshijnë: peshq të tillë si peshku shpatë, salmoni, toni dhe sardelet, të verdhat e vezëve, drithërat dhe qumështi.

Vitamina B12

Vitamina B12 luan një rol kyç në ruajtjen e shëndetit të sistemit nervor dhe rruazave të kuqe të gjakut. Pa mjaftueshëm vitaminë B12, trupi nuk mund të prodhojë qeliza të reja dhe të shëndetshme të kuqe të gjakut.

Mungesa e vitaminës B12 është një tjetër shqetësim i përhapur shëndetësor në Shtetet e Bashkuara, duke prekur rreth 6 për qind të njerëzve nën moshën 60 vjeç dhe gati 20 për qind të njerëzve mbi moshën 60 vjeç.

Për shkak se mungesa e vitaminës B12 mund të shkaktojë një gamë të gjerë simptomash, ajo shpesh diagnostikohet gabimisht ose anashkalohet.

Simptomat mund të zhvillohen gradualisht ose të shfaqen papritur dhe përfshijnë: dhimbje dhe dobësi muskulore, lodhje dhe rraskapitje, probleme me ecjen, gjuhë të ënjtur, gulçim, nervozizëm, diarre, rritje të rrahjeve të zemrës.

Nëse nuk trajtohet, mungesa e vitaminës B12 mund të çojë në anemi të rëndë, dëmtim nervor dhe degjenerim të shtyllës kurrizore.

Si të merrni më shumë vitaminë B12?

Rekomandimi aktual është që të rriturit të konsumojnë 2.4 mikrogramë vitaminë B12 në ditë.

Burimet më të pasura të vitaminës B12 janë ushqimet me origjinë shtazore si viçi, pula, peshku, vezët dhe produktet e qumështit.

Ushqimet bimore nuk përmbajnë natyrshëm vitaminë B12, por disa drithëra janë të fortifikuara me versione sintetike të vitaminës. Kjo është arsyeja pse veganët dhe vegjetarianët kanë një nga rreziqet më të larta të mungesës.

/Motilokal.com