Epidemiologu i njohur dr. Tritan Kalo, përmes një shkrimi në Facebook, ka dhënë disa këshilla për të mbajtur larg rrezikun e prekjes nga koronavirusi.

Ai ka apeluar qytetarët që të lajnë duart sa më shpesh si mbrojtja më e mirë ndaj viruseve, duke bërë thirrje për qetësi për të mos përhapur panik të panevojshëm.

“Kultura qytetare në sjelljen tonë në publik si dhe ndërgjegjësimi për higjienën personale e të mjedisit rrethues, janë dy hallka të rëndësishme si në parandalimin po ashtu edhe në kufizimin e rasteve me Covid-19. ‘Kushtojnë’ shumë-shumë pak por janë mjaft të efektshme”, shprehet mjeku Kalo.

Më tej ai ka ftuar qytetarët që të bëhen të gjithë pjesë e përballimit të këtij risku duke i ftuar që të kuptojnë mesazhet që na vijnë nga specialistët e fushës së epidemiologjisë.

“Sensibilizimi në këtë drejtim prej gjithsecilit prej nesh në mendimin tim, ndihmon më shumë se ironizimet sarkastike në prononcimet tona në FB….Para rrezikut eminent, teorizimet e shumta në këtë drejtim janë të pabukta…..Të kuptojmë qartë mesazhet që na vijnë si nga specialistët e fushave të Epidemiologjisë e Shëndetit Publik, Specialistët e Sëmundjeve Infektive si dhe të Urgjencave Mjekësore, e të bëhemi të gjithë pjesë e Përballimit të këtij risku, sikundër është mundësia e hyrjes së Covid-19 në Shqipëri….. Infeksioni nga Covid-19 është një formë tjetër e manifestimit të gripit, por me rrezikshmëri më të madhe…..mendjekthjellët dhe vullnetplotë uroj dhe shpresoj se do t’ia dalim”, shprehet ai./Motilokal.com