Zyrtarët në disa vende të Evropës Veriore këshilluan qytetarët të qëndrojnë në shtëpi të mërkurën pasi moti i keq shkaktoi kërdi në rrugë dhe ndërpreu transportin publik.

Bora e dendur dhe shiu i ngrirë goditën disa pjesë të Evropës Veriore dhe Qendrore të mërkurën, duke bllokuar trafikun, duke shkaktuar kaos në rrugë dhe ndërprerje të mëdha në aeroportet e rajonit.

Në Danimarkë, bora e dendur dhe erërat e forta i bënë të rrezikshme kushtet e rrugës me disa aksidente që shkaktuan vonesa në trafik. Trafiku hekurudhor u prek gjithashtu pasi policia këshilloi njerëzit të punonin nga shtëpia dhe të shtynin takimet.

Në kryeqytetin norvegjez Oslo, për shkak të shikueshmërisë së dobët dhe borës së madhe, është ndërprerë qarkullimi i autobusëve, gjë që ka lënë shumë njerëz të bllokuar. Moti i keq ka ndërprerë edhe qarkullimin rrugor, veçanërisht në jug të vendit, si dhe janë vonuar edhe shërbimet hekurudhore. Aeroporti i qytetit u mbyll përkohësisht të mërkurën pasi bora e madhe uli dukshmërinë për pilotët.

Në rajonin verilindor të Lorrenit të Francës, zyrtarët kanë lëshuar një paralajmërim portokalli për shi të ngrirë dhe borë. Janë regjistruar edhe aksidente të shumta trafiku, ndërsa transporti publik është në rrezik. Meteo France paralajmëroi të mërkurën për më shumë borë dhe shi në pjesën më të madhe të verilindjes së vendit.

Në Gjermani, rreth 700 fluturime u anuluan për shkak të kushteve ekstreme të motit në Aeroportin e Frankfurtit, qendra ajrore më e ngarkuar e vendit.

Reshjet e dendura të borës dhe shiu i ngrirë shkaktuan gjithashtu vonesa dhe anulime në aeroportet e tjera gjermane. Shiu i ngrirë në Gjermaninë perëndimore dhe jugore çoi në shumë aksidente në rrugët me akull në orët e para të mëngjesit të së mërkurës.

Si masë paraprake, shumë shkolla dhe kopshte u mbyllën gjatë ditës dhe disa kompani u ofruan punonjësve të tyre mundësinë për të punuar nga shtëpia.

Rajoni jugor belg është gjithashtu në alarm të kuq për shkak të shiut të ngrirë që ndikon në trafikun rrugor.

/Motilokal.com