Sipas raportit të fundit të Agjencisë Ndërkombëtare të Energjisë (IEA), kërkesa globale për naftë parashikohet të bie përgjysmë në vitin 2024 për shkak të erërave të kundërta makroekonomike, standardeve më të shtrënguara të efikasitetit dhe rritjes së flotës së automjeteve elektrike, transmeton Anadolu.

Në raportin e “Tregut të naftës” për muajin dhjetor, IEA-ja tha se rritja e kërkesës globale për naftë pësoi një ngadalësim të dukshëm në tremujorin e katërt të vitit 2023, duke shënuar rënie në 1.7 milion fuçi në ditë (bpd), respektivisht një rënie të ndjeshme nga norma prej 3.2 milionë fuçi në ditë gjatë tremujorëve të dytë dhe të tretë të vitit.

Duke reflektuar zbutjen e rritjes së kërkesës së Kinës për udhëtime pas pandemisë COVID-19, rritja parashikohet të lehtësohet më tej nga 2.3 milion fuçi në ditë në vitin 2023 në 1.2 milion fuçi në ditë në vitin 2024, duke u ndikuar nga erëra të ndryshme makroekonomike, përfshirë standardet më të rrepta të efikasitetit dhe zgjerimin e flotës së automjeteve elektrike.

Pamja e kërkesës globale ndikohet shumë nga Kina, e cila do të kontribuojë në pothuajse 60 për qind të rritjes së kërkesës botërore të këtij viti. Vitin e kaluar, kontributi i Kinës ishte edhe më i lartë, duke kaluar 75 për qind pasi vendi u rikuperua nga bllokimet e tij të pandemisë.

Prodhimi global do të arrijë rekorde të reja në vitin 2024

Nga ana tjetër, SHBA-ja, Brazili, Guajana dhe Kanadaja shënuan një prodhim rekord, me naftën globale që këtë vit pritet të arrijë një nivel të ri të lartë prej 103.5 milionë fuçi në ditë.

Prodhimi i vendeve jo anëtare të grupit OPEC+ pritet të mbizotërojë këtë vit, duke kontribuar në rritje me afër 1.5 milion fuçi në ditë.

Në të kundërtën, furnizimi i 22 anëtarëve të grupit OPEC+ parashikohet të mbetet relativisht i qëndrueshëm në krahasim me vitin e kaluar, duke supozuar se shkurtimet shtesë vullnetare të nisura kohët e fundit do të hiqen gradualisht në tremujorin e dytë të vitit 2024.

Furnizimi nga 12 anëtarët aktual të grupit OPEC, në muajin dhjetor u rrit me 50 mijë fuçi në ditë duke arritur në 27.02 milionë fuçi në ditë, ndërsa flukset nga dhjetë vendet jo anëtare të grupit OPEC u ulën me rreth 20 mijë fuçi në ditë, respektivisht në 14.83 milionë fuçi në ditë.

Flukset më të larta nga Nigeria dhe rritje më të vogla nga Iraku, Arabia Saudite dhe Kazakistani kompensuan humbjet në Iran, Kuvajt dhe gjetkë.

Megjithatë, prodhimi në muajin janar pritet të bie pasi fillojnë frenimet shtesë të furnizimit të grupit OPEC+ dhe ndërkohë protestat detyrojnë mbylljen e fushës më të madhe të naftës në Libi.

/Anadolu/Motilokal.com