Bashkimi Evropian ka miratuar legjislacionin që do të ndalonte shitjen e veturave me motor me djegie të brendshme në vendet anëtare nga viti 2035, duke iu bashkuar disa shteteve të SHBA-së dhe Kanadasë, Japonisë, Singaporit, Indisë, Zelandës së Re dhe një numri vendesh të tjera që tashmë kanë plane të ngjashme.

Megjithatë, një vend krejtësisht i papritur vendosi të ndalojë përfundimisht motorët me benzinë dhe naftë tashmë tani. Bëhet fjalë për shtetin e varfër afrikan të Etiopisë. Sipas lajmeve të fundit nga parlamenti i tyre, Alemu Sime, Ministri i Transportit dhe Logjistikës i Etiopisë, njoftoi se "është marrë një vendim që në të ardhmen veturat nuk do të mund të importohen në Etiopi nëse nuk janë elektrike". Duke qenë se ky vend afrikan nuk ka industrinë e vet të automobilave, kjo do të nënkuptonte në mënyrë efektive një ndalim të shitjes së të gjitha veturave të reja me benzinë dhe naftë.

Arsyeja e vendimit të Etiopisë për të bërë një lëvizje të tillë nuk është mbrojtja e mjedisit apo ngrohja globale, por borxhi i madh i vendit dhe mungesa e produkteve të naftës. Për shkak të paaftësisë paguese, Etiopia është shumë e vështirë të marrë naftë dhe gjysma e produkteve të naftës të importuara shpenzohen për ndezjen e veturave. Nëse ky ndalim futet zyrtarisht, Etiopia do të bëhet vendi i parë në botë që do të lejojë shitjen vetëm të veturave elektrike.

Situata është mjaft absurde sepse një numër i madh i familjeve në Etiopi nuk kanë fare energji elektrike dhe nuk ka infrastrukturë për mbushjen e veturave elektrike. Por vetëm qytetarët e rrallë të këtij vendi do të duhet të përballen me këto probleme. Etiopia është një nga vendet më të varfra në botë, ndaj nuk është çudi që ka shumë pak vetura, konkretisht në të gjithë vendin që ka 120 milionë banorë, ka më pak se 200 mijë vetura. Kjo do të thotë 1.6 vetura për 1000 banorë.

/Motilokal.com