Alarmi ka rënë tashmë krahasuar me dhjetorin 2023, shitjet e automjeteve të reja elektrike në Gjermani ranë me 54.9 për qind në janar, ndërsa shitjet e hibridëve plug-in ranë me 19.6 për qind. Nga ana tjetër, tregu i automjeteve me djegie të brendshme shënoi rritje, benzinë +9.1 për qind dhe naftë +9.5 për qind.

Pavarësisht një rikuperimi të lehtë në shitjet e automjeteve me djegie të brendshme, tregu i përgjithshëm i automjeteve ra 11.7 për qind krahasuar me dhjetorin 2023, sipas Auto Business Insight. Edhe pse përfundimi i papritur i stimujve për blerjen e veturave elektrike ka kontribuar padyshim në rënien e shitjeve të automjeteve elektrike, nuk është arsyeja e vetme e rënies së përgjithshme të shitjeve.

Rënia e shitjeve filloi në dhjetor, duke nxitur ekspertë të tillë si Constantin Gallo, partner menaxhues në EY për tregjet e Evropës Perëndimore, të sugjerojnë se ka çështje themelore që kontribuojnë në këtë trend.

“Dobësia ekonomike, kostot e larta të financimit dhe tensionet e rëndësishme gjeopolitike po çojnë në blerje më të dobëta të veturave të reja nga individë dhe biznese”, tha Gall për Wall Street Journal. Ndërsa pranon se mungesa e stimujve për veturat elektrike dhe hibridet plug-in do të jetë një sfidë për prodhuesit e automjeteve, ai shton se "në përgjithësi, viti 2024 ka të ngjarë të jetë një vit i vështirë për industrinë e automjeteve".

Kjo hap një luftë çmimesh në Gjermani, ku kompani të tilla si VW, Tesla dhe BYD e Kinës kanë njoftuar ulje çmimesh për modelet elektrike. Duke marrë parasysh perspektivat aktuale të këqija të ekonomisë gjermane, analistët parashikojnë se ulja e çmimeve do të vazhdojë edhe në vitin 2024.

Shoqata gjermane e industrisë së automobilave, VDA, parashikon rritje 2 për qind në tregun global të veturave të pasagjerëve në vitin 2024, duke arritur në 77.4 milionë vetura, pothuajse në nivelin 78.8 milionë, që janë shifrat para pandemisë.

Megjithatë, shoqata parashikon një tkurrje prej 1 për qind në tregun gjerman të veturave për të njëjtin vit, me shitjet që bien në 2.82 milionë vetura, 25 për qind më pak nga nivelet para pandemisë, sipas Reuters. Në veçanti, shitjet e automjeteve elektrike parashikohen të bien me rreth 9 për qind në vitin e ardhshëm, pavarësisht një rritje prej 19 për qind të prodhimit.

Për fat të mirë, Gjermania mbetet një nga eksportuesit më të mëdhenj të veturave në botë, gjë që mund të ofrojë lehtësim për prodhuesit e automjeteve mes rrethanave sfiduese për industrinë.

/Motilokal.com