Shkencëtarët thonë në një studim të ri se uraganet janë bërë aq të fortë për shkak të ndryshimeve klimatike sa duhet të futet një kategori e re e forcës prej 6 (shkalla e mëparshme ka kategori nga 1 në 5) për të ashtuquajturat "mega-uragane". Gjatë dekadës së fundit, janë regjistruar pesë stuhi që mund të përfshihen në kategorinë e re. "Mega-uragane" janë stuhitë me erëra të qëndrueshme prej 308 km/h ose më shumë.

"308 km/h, kjo është ndoshta më e shpejtë se shumica e Ferrari-ve, është e vështirë të imagjinohet. Nuk do të ishte mirë të ishe në mes të një uragani të asaj fuqie", tha Michael Wehner nga Laboratori Kombëtar Lawrence Berkeley në SHBA. Në studim, shkencëtarët propozuan një shtrirje të shkallës së uraganit Saffir-Simpson, e cila u zhvillua në fillim të viteve 1970 nga inxhinieri Herbert Saffir dhe meteorologu Robert Simpson.

Kategoritë e mëparshme

Sipas shkallës së lartpërmendur, çdo uragan me një shpejtësi maksimale të qëndrueshme të erës prej 119 km/h ose më shumë bie në kategorinë 1. Me rritjen e shpejtësisë së erës dhe rritjen e rrezikut për pronën dhe jetën, niveli i kategorisë rritet. Uraganet me erëra të qëndrueshme prej 252 km/h e lart i përkasin kategorisë më të lartë 5.

Stuhitë e kësaj kategorie kanë shkaktuar dëme të mëdha vitet e fundit si Uragani Katrina që shkatërroi New Orleans në 2005 dhe uragani shkatërrues Maria në Porto Riko në 2017. Por shkencëtarët thonë se për shkak të ndryshimeve klimatike ka stuhi më ekstreme që duhet të kenë kategorinë e tyre.

Shembujt përfshijnë tajfunin Haiyan, i cili vrau më shumë se 6,000 njerëz në Filipine në vitin 2013 dhe Uragani Patricia, i cili arriti një shpejtësi maksimale prej 346 km/h kur u formua pranë Meksikës në 2015.

"Stuhitë tashmë janë bërë më intensive dhe do të vazhdojnë të bëhen"

"Deri më tani nuk ka pasur asnjë në Oqeanin Atlantik apo në Gjirin e Meksikës. Por ky është vetëm fat sepse ka kushte për të formuar një stuhi të kategorisë 6 atje. Shpresoj që nuk do të ndodhë, por asgjë nuk është e sigurt, stuhitë tashmë janë bërë më intensive dhe do të vazhdojnë”, tha Wehner. 

Edhe pse numri i përgjithshëm i uraganeve nuk po rritet për shkak të ndryshimeve klimatike, intensiteti i tyre është rritur ndjeshëm. Oqeanet e mbinxehur dhe një atmosferë më e ngrohtë plot lagështi u japin stuhive energji shtesë. “Qëllimi ynë kryesor është të rrisim ndërgjegjësimin se ndryshimet klimatike po ndikojnë në stuhitë më të forta”, thotë Wehner.

/Motilokal.com