Shërbimi i Ndryshimeve Klimatike Copernicus (C3S) njoftoi se shkurti i këtij viti ishte më i ngrohti deri më tani. Temperatura mesatare globale është 1.77°C më e lartë se mesatarja mujore dhe shkurti është muaji i nëntë me radhë në të cilin është vendosur një rekord mujor i nxehtësisë, shkruan New Scientist.

“Sado befasuese të duken këto temperatura, ato në fakt nuk janë të çuditshme sepse ngrohja e vazhdueshme e sistemit klimatik në mënyrë të pashmangshme çon në ekstreme të reja të temperaturës”, tha Carlo Buontempo nga C3S.

Ishte veçanërisht nxehtë në Evropë, ku temperaturat mesatare u rritën me 3.3°C sipas llogaritjeve nga viti 1991 deri në vitin 2020. Temperaturat e larta dhe moti i thatë në Amerikën Veriore dhe Jugore nxitën zjarret, duke përfshirë zjarrin më vdekjeprurës të pyjeve në historinë e Kilit.

Temperatura e oqeanit ishte edhe më ekstreme, kështu që temperatura mesatare e detit në shkurt e kaloi gushtin 2023, e cila u konsiderua më e ngrohta në histori. Një temperaturë mesatare e sipërfaqes së detit prej 21.09°C u regjistrua në fund të shkurtit, ndërsa akulli i detit në Arktik dhe Antarktik ishte nën mesataren.

Richard Allan nga Universiteti i Reading në Britania e Madhe tha se nxehtësia rekord në tokë dhe det ishte kryesisht për shkak të përqendrimeve në rritje të gazeve serrë në atmosferë që përkoi me El Niño në Oqeanin Paqësor. Sipas parashikimeve të Institutit Kombëtar të Oqeanit të SHBA-së, El Niño që u shfaq në qershor 2023 duhet të dobësohet dhe t'i lërë vendin një La Niña më të freskët nga mesi i këtij viti.

/motilokal.com