Një valë e të nxehtit ka goditur Brazilin, duke vendosur rekorde të reja në indeksin e nxehtësisë në Rio de Zhaneiro që ka arritur në 62.3 gradë Celsius, më i larti në një dekadë, thonë autoritetet e motit.

Indeksi i nxehtësisë mat se si ndihet një temperaturë duke marrë parasysh lagështinë. Temperatura maksimale aktuale në qytet ishte 42 gradë Celsius të hënën, tha sistemi i motit Rio Alert.

Rekordi 62.3 gradë Celsius u shënua në Rio perëndimore në orën 09:55 të mëngjesit (12:55 GMT) të dielën dhe ishte më e larta që kur Rio Alert filloi të mbante rekorde të tilla në 2014.

Plazhet Ipanema dhe Copacabana ishin të mbushura me njerëz pasi autoritetet publikuan këshilla për përballimin e të nxehtit.

"Kam shumë frikë se do të përkeqësohet sepse popullsia po rritet shumë dhe shpyllëzimi është shumë i lartë për shkak të rritjes së banesave", u ankua një 49-vjeçare Raquel Correia në një park në qendër të Rios.

Rekordi i mëparshëm i indeksit të nxehtësisë u vendos në nëntor kur arriti në 59.7 gradë Celsius.

Ndërkohë, reshjet ekstreme të shiut kanë bërë kërdi në jug të vendit dhe parashikohet të vazhdojnë javën e ardhshme, sipas autoriteteve.

“Java do të jetë me rrezik shumë të lartë në qendër-jug të Brazilit për shkak të shirave dhe stuhive intensive. Sistemi më shqetësues është një front shumë intensiv i ftohtë që do të arrijë me shira të rrëmbyeshëm dhe stuhi të mundshme”, paralajmëroi agjencia e informacionit të motit MetSul.

/Motilokal.com