Shërbimi i Kërkim Shpëtimit Malor të Kosovës ka dalë më një apel për qytetarët që dëshirojnë të bëjnë ski dhe të vizitojnë bjeshkët.

“Nga këto momente deri në 72 orët e ardhshme luteni të keni kujdes dhe t’i evitoni aktivitetet e juaja në vendet e ekspozuara ndaj rrezikut”, thuhet në njoftim.

Njoftimi i plotë:

Vëmendje!

Të nderuar bjeshkatarë, skitarë dhe qytetarë!

Prej reshjeve te fundit të borës nga nata e mbrëmshme, gjendja e sigurisë në male, sa i përket ortekëve është kritike.

Nga këto momente deri në 72 orët e ardhshme luteni të keni kujdes dhe t’i evitoni aktivitetet e juaja në vendet e ekspozuara ndaj rrezikut.

Niveli i rrezikshmërisë nga ortekët është në shkallën 5 (shumë e rrezikshme).

Gjithashtu të keni kujdes edhe në komunikacion në zonat malore, gjendja e rrugëve është konform kushteve malore.

Andaj të keni kujdes gjatë skive (jashtë shtigjeve të rregulluara) apo ngjitjeve bjeshkatare në sipërfaqet e pjerrëta malore nga 30°~50°, e sidomos në shtigjet apo kalimet e ekspozuara.

Pas reshjeve të borës pritni për 48 orë të tranzicionit të shtresave të borës.

Mos skioni/ngjiteni të vetmuar!

Planifikoni itinerarin me kujdes dhe njoftoni të tjerët për atë!

Kujdes gjatë skive në pyje, gropat e drunjve janë të rrezikshme dhe vdekjeprurëse!

Nëse zhvilloni aktivitete të ski-bjeshkatarisë doemos posedoni pajisjet obligative për siguri:

• Transmetuesin
• Lopatën
• Sondën
• Çantën e ndihmës së parë
• Helmetën
• Kazmën
• Kthetrat
• Veshmbathje adekuate dimërore
• Telefonin e mbushur
• Llambë,

dhe të gjitha pajisjet e tjera të nevojshme.

Për çdo urgjencë kontaktoni në numrat:

112

+383 49 84 02 28

/Motilokal.com