Për shkak të disponueshmërisë dhe përshtatshmërisë së tij ndaj vakteve të ndryshme, shumë njerëz hanë oriz rregullisht, e disa prej tyre edhe çdo ditë. Por, përkundër kësaj, ka njerëz që e shmangin atë sepse në radhë të parë është burim i karbohidrateve.

Ashtu si makaronat dhe pastat, orizi gjithashtu shpesh merr një "emër të keq" për shkak të përmbajtjes së lartë të karbohidrateve. Por në fakt, orizi ka shumë përfitime për trupin tonë.

"Orizi mund të jetë një karbohidrat kaq i arritshëm dhe i përshtatshëm dhe ne duhet të ndalojmë së demonizuari dhe në vend të kësaj t'i ndihmojmë njerëzit të kuptojnë se si ta konsumojnë më mirë. Orizi mund të jetë absolutisht pjesë e një diete të shëndetshme", thotë dietologia Laura Ligos.

Megjithatë, ajo vjen me disa të meta të mundshme që janë të rëndësishme për t'u mbajtur parasysh.

Burim energjie

Sipas nutricionistëve, orizi është një drithëra e shëndetshme e pasur me lëndë ushqyese dhe karbohidrate, e cila duhet konsumuar çdo ditë. Karbohidratet duhet të përbëjnë rreth 40 për qind deri në 65 për qind të kalorive tona ditore, sepse ato na japin energjinë që na nevojitet çdo ditë. Përveç kësaj, ato janë të rëndësishme për prodhimin e hormoneve dhe funksionin kognitiv.

Tretje më e qetë

Orizi është një pjesë integrale e dietës që shpesh rekomandohet për ata që luftojnë ose shërohen nga të përzierat, të vjellat ose gjendje të ngjashme. Orizi tolerohet dhe tretet lehtësisht sepse përmban sasi të vogla yndyre. Ngrënia e karbohidrateve lehtësisht të tretshme mund të jetë e dobishme nëse keni stomak të ndjeshëm ose po shëroheni nga një sëmundje.

Mikronutrientë të ndryshëm

Në varësi të llojit të orizit që zgjidhni, ai ka përfitime të ndryshme shëndetësore. Orizi përmban më shumë se 15 vitamina dhe minerale thelbësore, duke përfshirë acidin folik, vitaminat B, kalium, magnez, selen, fibra, hekur dhe zink. Orizi i bardhë dhe i kaftë kanë disi profile të ngjashme ushqyese, megjithëse orizi kaf ka pak më shumë kalori, fibra, proteina, mangan, selen, magnez dhe vitamina B.

Sheqeri juaj në gjak mund të rritet

Për shkak të përqindjes më të lartë të karbohidrateve, vetëm një pjesë e orizit mund të rrisë nivelin e sheqerit në gjak. Indeksi i glicemisë është një masë që tregon se sa ushqimi ndikon në sheqerin në gjak dhe orizi është afërsisht në mes, mbi misër dhe pak poshtë grurit. Të qenit joaktiv ose të mos hani mjaftueshëm proteina dhe yndyra me oriz mund të ndikojë negativisht në sheqerin tuaj në gjak.

Ju mund të rrisni konsumin tuaj të arsenikut

Krahasuar me drithërat e tjerë, orizi mund të jetë një burim më i madh arseniku, një përbërës kimik që është natyrshëm i pranishëm në tokën dhe ujin tonë në disa pjesë të botës. Organizata Botërore e Shëndetësisë (OBSH) thotë se ekspozimi ndaj arsenikut mund të shoqërohet me një rrezik në rritje të kancerit me kalimin e kohës.

Për të kufizuar konsumin e arsenikut, zgjidhni orizin e rritur në zona që prodhojnë oriz me nivel të ulët arseniku dhe lajeni përpara se ta gatuani dhe hani. Gjithashtu, këshillohet përzierja e drithërave si quinoa, bulgur, të cilat përmbajnë një nivel më të ulët arseniku.

/Motilokal.com