Shkencëtarët japonezë kanë zbuluar zyrtarisht satelitin e parë prej druri në botë. I quajtur LignoSat, ky satelit u krijua në bashkëpunim midis Universitetit të Kiotos dhe kompanisë Sumimoto Forestry dhe duhet të hidhet në hapësirë këtë vjeshtë.

Siç theksojnë ata, ky satelit i vogël me përmasa vetëm dhjetë centimetra mund të përfaqësojë një hap të madh përpara kur bëhet fjalë për qëndrueshmërinë e hapësirës.

Satelitët që nuk janë prej metali duhet të bëhen të zakonshëm, vuri në dukje profesor Takao Doi në një konferencë për shtyp.

Ky satelit japonez mund të jetë në gjendje të zgjidhë një nga problemet më të mëdha me të cilat përballet industria hapësinore, akumulimin e mbeturinave hapësinore. Përkatësisht, shumica e satelitëve aktualë janë prej metali dhe plastike. Kur mbarojnë jetën e tyre në orbitë, zakonisht rihyjnë në atmosferën e Tokës dhe digjen. Megjithatë, shkencëtarët paralajmërojnë se grimcat metalike të prodhuara nga djegia në atmosferë mund të ndotin më tej atmosferën tashmë të ndotur.

Një satelit prej druri, në këtë rast prej druri të magnolisë, do të digjet plotësisht me hyrjen në atmosferë dhe kështu do të zvogëlojë ndjeshëm ndikimin e tij në mjedis.

Por për këtë do të duhet të presim edhe pak. LignoSat është ende një eksperiment për momentin dhe, megjithëse do të lëshohet në hapësirë, nuk do të shkojë direkt në orbitë. Kur një raketë SpaceX e ngre atë në shtator, ajo së pari do ta lëshojë atë në modulin e eksperimentit të Agjencisë Hapësinore Japoneze në Stacionin Ndërkombëtar të Hapësirës. Pas kësaj, astronautët do ta hedhin atë në orbitë dhe shkencëtarët në Tokë shpresojnë të marrin të dhëna interesante prej saj.

/Motilokal.com