Qytetet evropiane duhet urgjentisht të zbatojnë masa për të zbutur efektet e valëve të të nxehtit ndërsa kontinenti nxehet, me temperaturat që rriten dy herë më shpejt se mesatarja botërore, paralajmëron një raport i ri nga konsulenca e arkitekturës dhe inxhinierisë Sweco. Këto masa duhet të përfshijnë inovacionin dixhital, zgjidhjet e bazuara në natyrë, "infrastrukturën blu-jeshile" dhe ndërtesat me performancë të lartë, pretendon Sweco.

Vitin e kaluar u regjistrua një numër rekord i ditëve me vapë ekstreme, kujton Sweco dhe paralajmëron se vdekshmëria si pasojë e nxehtësisë ekstreme në Evropë është rritur me rreth 30 për qind në 20 vitet e fundit. Përveç rreziqeve të konsiderueshme për shëndetin publik, valët e të nxehtit gjithashtu ndikojnë negativisht në infrastrukturën dhe produktivitetin ekonomik në zonat urbane, thuhet në dokument.

Raporti, i cili analizoi situatën në 24 qytete evropiane, tregon se rreziqet e lidhura me nxehtësinë shpesh neglizhohen në planet klimatike dhe se qytetet në Evropën veriore janë krijuar për të mbrojtur popullsinë nga i ftohti dhe jo nga nxehtësia.

Analiza tregon gjithashtu se sa rritje e temperaturës pritet në secilin prej qyteteve në periudhën 2020-2100. Rritja e parashikuar e numrit të ditëve jashtëzakonisht të nxehta për Kopenhagen është 160 për qind, për Stokholmin 150 për qind, për Oslo 140 për qind, 130 për qind për Roterdamin dhe Brukselin dhe 100 për qind për Helsinkin.

Ndërsa raporti tregon se disa qytete evropiane po ndërmarrin hapa në drejtimin e duhur, ai vë në dukje se ka ende boshllëqe të mëdha që duhet të adresohen. Në planet e tyre klimatike, qytetet evropiane duhet të përqendrohen më shumë në mbrojtjen e grupeve vulnerabël duke përmirësuar sistemet e ftohjes së objekteve të tilla si parashkollorët apo shtëpitë e pleqve, thotë raporti.

Raporti rekomandon gjithashtu që qytetet të punojnë së bashku për të përballuar në mënyrë efektive valët e të nxehtit duke investuar në njohuri, duke përdorur të dhëna përkatëse dhe duke planifikuar së bashku për të adresuar krizat e valëve të të nxehtit. Autoritetet duhet të krijojnë strategji më efektive për të mbrojtur grupet vulnerabël, për të ruajtur shëndetin e përgjithshëm publik dhe për të rritur barazinë klimatike, u theksua.

/Motilokal.com