Qyteti i dytë më i madh i Pakistanit, Lahore, u godit nga reshje rekord shiu të enjten, me ndërtesa, rrugë të përmbytura, ndërprerje të energjisë, njoftoi agjencia kombëtare e motit.

Qyteti lindor regjistroi rreth 360 milimetra shi në tre orë, tha Departamenti Meteorologjik i Pakistanit (PMD).

“Ishte një reshje rekord”, deklaroi zëvendësdrejtori i agjencisë, Farooq Dar për AFP.

Rekordi i mëparshëm daton në korrik të vitit 1980, ku u regjistruan 332 milimetra shi në tre orë.

PMD ka parashikuar një sezon musonesh më të lagësht se zakonisht këtë vit për Pakistanin, një nga vendet që ekspertët thonë se është më i prekshëm ndaj kushteve ekstreme të motit të nxitura nga ndryshimet klimatike.

Gjatë tre ditëve të fundit, 24 njerëz kanë vdekur për shkak të reshjeve në provincën malore veriperëndimore të Khyber Pakhtunkhwa, tha departamenti provincial i menaxhimit të fatkeqësive.

Në Lahore, një qytet me 13 milionë banorë në provincën lindore të Punjabit, një person u godit nga rryma si pasojë e një shpërthimi të reve të enjten, tha policia lokale.

Komisioneri i qytetit shpalli gjendjen e jashtëzakonshme dhe njoftoi se zyrat dhe shkollat do të mbylleshin gjatë ditës.

Musoni i verës i sjell Azisë Jugore rreth 70 deri në 80 për qind të reshjeve vjetore të rajonit midis qershorit dhe shtatorit.

Kjo është jetike për bujqësinë, por ndryshimi i modeleve të motit që shkencëtarët ia atribuojnë ndryshimit të klimës po vënë në rrezik jetët dhe jetesën.

Gjatë këtij viti, Pakistani, shtëpia e 240 milionë njerëzve, u godit nga një sërë valësh të nxehtit dhe ky prill ishte më me shi që nga viti 1961.

Të paktën 143 njerëz vdiqën nga goditjet e rrufesë dhe aksidentet e tjera të lidhura me stuhinë në prill.

Në Indinë fqinje, të paktën 160 njerëz, që besohet se janë kryesisht punëtorë dhe familjet e tyre, kanë vdekur pasi shirat e rrëmbyeshëm shkaktuan rrëshqitje të dheut në shtetin bregdetar jugor të Kerala.

Në vitin 2022, një e treta e Pakistanit u përmbyt nga shirat e paprecedentë të musonit që zhvendosën miliona njerëz dhe kushtuan 30 miliardë dollarë, sipas vlerësimeve të Bankës Botërore, raporton AFP.

/Motilokal.com