Gjigantët e teknologjisë si Google, Microsoft, Meta dhe Amazon po investojnë me shpejtësi shuma të mëdha në qendrat e të dhënave që 'përdorin' shumë energji elektrike për shërbimet e bazuara në Inteligjencën Artificiale.

Sipas një studimi të një banke amerikane, deri në vitin 2030, qendrat e të dhënave do të lëshojnë në atmosferën e Tokës rreth 2.5 miliardë ton metrikë gazra të dëmshëm, që korrespondon me pothuajse 40 për qind të emetimit total të SHBA-së.

Kompanitë janë zotuar të reduktojnë emetimet deri në fund të dekadës, por një raport i Morgan Stanley sinjalizon "sfida" të rëndësishme në arritjen e objektivave.

Në hulumtimet e mëparshme, banka llogariti se rritja e Inteligjencës Artificiale do të stimulojë një rritje prej 70 për qind të kërkesës për energji deri në vitin 2027 , kryesisht për shkak të ndërtimit të qendrave të të dhënave.

“Përmbushja e kësaj kërkese do të kërkojë investime të konsiderueshme në infrastrukturën e re për prodhimin dhe transmetimin e energjisë”, thekson Morgan Stanley.

Deri në vitin 2027, Inteligjenca Artificiale gjeneruese do të jetë e barabartë me vendet si Spanja në konsumin e energjisë elektrike, theksojnë ata.

Qeveria lokale ka frikë se kompanitë nuk do të përmbushin premtimet e tyre për dekarbonizimin dhe mbështetjen minimale në rrjete, kështu që, për shembull, këshilli i komunës irlandeze të Dublinit Jugor bllokoi planin e Google për të ndërtuar një qendër të dhënash pranë Dublinit në një sipërfaqe prej 72,400 metra katrorë sepse nuk specifikohej se sa energji do të konsumonte.

Megjithëse zgjerimi i rrjeteve të qendrave të të dhënave do të rezultojë në mënyrë të pashmangshme në çlirimin e sasive më të mëdha të gazrave të dëmshëm, ai gjithashtu paraqet një mundësi për investime të shtuara në energji të pastër, pajisje me efikasitet energjetik dhe materiale të qëndrueshme, theksojnë ekspertët e bankës.

“Kjo krijon një treg të madh për zgjidhjet e dekarbonizimit”, shpjegojnë ata.

Kështu, kompanitë do të investojnë në teknologjitë e dekarbonizimit, të tilla si kapja, përdorimi dhe ruajtja e karbonit (CCUS) dhe heqja e dioksidit të karbonit, parashikon Morgan Stanley.

/Motilokal.com