Prediabeti është një gjendje në të cilën niveli i sheqerit në gjak është i ngritur, por nuk është aq i lartë sa për t'u diagnostikuar si diabet. Kjo gjendje zakonisht zbulohet përmes analizave të gjakut.

Doktori Jonathan Kaplan tha për Eating Well se prediabeti është një gjendje që tregon se është koha për të bërë ndryshime përpara se të ndodhin komplikime serioze. Ai veçoi disa ndryshime që janë të rëndësishme për t'u futur në jetë.

Ngrënia e ushqimeve të pasura me fibra mund të ngadalësojë përthithjen e sheqerit në qarkullimin e gjakut dhe të ndihmojë në ruajtjen e niveleve të qëndrueshme të sheqerit në gjak. Dr. Kaplan rekomandon marrjen e 25 deri në 30 gram fibra në ditë, të cilat do të shpërndahen gjatë vakteve.

Përveç kësaj, aktiviteti i rregullt fizik e bën më të lehtë për trupin të rregullojë sheqerin në gjak dhe përmirëson ndjeshmërinë ndaj insulinës.

“Kam parë shumë përmirësim te pacientët që ushtrojnë rregullisht, sepse kur ushtroni muskujt tuaj nuk kanë nevojë për insulinë për të përdorur glukozën si lëndë djegëse”, tha ai.

Ai rekomandon futjen e ecjeve 10-minutëshe gjatë ditës, të cilat përfundimisht duhet të rriten në 30 minuta. Ai gjithashtu thekson se një peshë e shëndetshme trupore është më e rëndësishmja për menaxhimin e diabetit. Për këtë ai rekomandoi kombinimin e ushtrimeve të forcës me një plan diete.

Kaplan thekson se gjumi i rregullt dhe i koordinuar është shumë i rëndësishëm për personat me prediabet dhe për këtë arsye këshillon të flini në të njëjtën orë çdo natë. Përveç kësaj, stresi mund të ketë një ndikim të madh në nivelet e sheqerit në gjak, ndaj ai rekomandon teknika të thjeshta të frymëmarrjes, veçanërisht para ngrënies.

Monitorimi i niveleve të sheqerit në gjak është gjithashtu një faktor i rëndësishëm pasi i ndihmon pacientët të shohin se si trupi i tyre reagon ndaj llojeve të ndryshme të ushqimit dhe aktivitetit.

/Motilokal.com