Guvernatori i Bankës së Shqipërisë, Gent Sejko, theksoi sot se një nga sfidat më të mëdha për ekonominë shqiptare është rritja e produktivitetit dhe arritja e një konkurrueshmërie të krahasueshme me atë të vendeve të zhvilluara evropiane.

Në një aktivitet të zhvilluar në një universitet privat në vend, Sejko theksoi se, megjithë përmirësimet e deritanishme, Shqipëria ka ende punë për të bërë për të pasur një strukturë ekonomike që orienton më shumë në sektorë me vlerë të lartë të shtuar.

Një tjetër sfidë e rëndësishme, që ka pasoja jo vetëm për ekonominë shqiptare, por edhe për atë evropiane dhe globale, është plakja e popullsisë dhe mungesa e fuqisë punëtore. Ai nënvizoi se ky proces ndikon si në tregun e punës, ashtu edhe në perspektivat afatgjata të rritjes ekonomike dhe të qëndrueshmërisë së sistemit të pensioneve dhe borxhit publik.

Guvernatori gjithashtu përmendi ndikimin e ndryshimeve klimatike në sektorë të rëndësishëm si bujqësia dhe turizmi, sektorë që janë të ndjeshëm ndaj këtyre ndryshimeve. Sipas tij, këta dy sektorë, përveç ndikimit të drejtpërdrejtë në aktivitetin ekonomik dhe punësim, përbëjnë një potencial të madh për zhvillimin e ekonomisë shqiptare në të ardhmen.

Për t’i adresuar këto sfida, Sejko theksoi nevojën për një qasje të integruar dhe vizion strategjik. Ai theksoi disa hapa që duhet të ndërmerren, duke përfshirë investimin në modernizimin e infrastrukturës fizike dhe digjitale, zhvillimin e kërkimit shkencor, përditësimin e praktikave menaxheriale dhe përmirësimin e klimës së biznesit.

Përveç kësaj, ai theksoi se investimi në zhvillimin e kapitalit njerëzor është thelbësor për fuqizimin e ekonomisë, duke përfshirë përmirësimin e sistemit arsimor dhe krijimin e programeve të specializuara për aftësimin profesional. Ai gjithashtu përmendi nevojën për të krijuar stimuj për rikthimin e diasporës dhe përmirësimin e kushteve të punës, që do të ndihmonin në frenimin e largimit të të rinjve dhe nxitjen e ndërtimit të të ardhmes brenda vendit.

Një tjetër hap i rëndësishëm është shfrytëzimi optimal i pasurive natyrore të vendit, duke përfshirë resurset energjetike, minerare, bujqësore dhe turistike. Kjo kërkon një strategji të mirëkoordinuar për të shmangur pasojat negative dhe për të orientuar politikat e zhvillimit publik dhe burimet financiare të sektorit privat.

Guvernatori gjithashtu vlerësoi rritjen e aktivitetit ekonomik në vend me një 18,3% në krahasim me fundin e vitit 2019, me rritje të punësimit dhe pagave përkatësisht me 3,9% dhe 15,4%, ndërsa shkalla e papunësisë ka arritur një minimum historik prej 10,7%. Ai gjithashtu vuri në dukje përmirësimin e treguesve ekonomikë dhe financiarë, përfshirë uljen e inflacionit në 2,2% dhe përmirësimin e shëndetit të sektorit bankar, që ka çuar në një vlerësim më të mirë të rrezikut të kreditit të Shqipërisë nga institucionet ndërkombëtare.

/Motilokal.com