Është e mundur të jeni alergjik ndaj shumë gjërave, përfshirë edhe temperaturat e ftohta. Një nga simptomat më të zakonshme të kësaj gjendjeje është urtikaria e ftohtit, e cila shfaqet si skuqje dhe njolla në lëkurë pas ekspozimit ndaj temperaturave të ulëta.

Sipas mjekëve, personat me këtë alergji mund të përjetojnë ndryshime të pazakonta në lëkurë ose simptoma të tjera pas kontaktit me të ftohtin. Në disa raste, kjo gjendje mund të shfaqet papritur dhe të zhduket me kalimin e kohës, ndërsa tek disa njerëz mbetet e përhershme.

Megjithëse në shumicën e rasteve simptomat janë të lehta, në raste të rralla mund të ndodhë një reaksion i rëndë alergjik, i njohur si anafilaksi, i cili mund të jetë kërcënues për jetën.

Simptomat e alergjisë ndaj të ftohtit

Simptomat më të zakonshme përfshijnë:

• Skuqje, kruajtje dhe njolla të ngritura në lëkurë (urtikarie) në zonat e ekspozuara ndaj të ftohtit
• Ndjesi djegieje në lëkurë gjatë ngrohjes së trupit
• Ënjtje në zonën e prekur
• Temperaturë
• Dhimbje koke dhe dhimbje kyçesh
• Lodhje dhe ndjenjë ankthi

Kur duhet kërkuar ndihmë mjekësore?

Nëse shfaqen simptomat e mëposhtme, kërkoni menjëherë ndihmë mjekësore, pasi mund të jenë shenja të anafilaksisë:

• Probleme me frymëmarrjen
• Ënjtje e gjuhës ose fytit
• Rënie e menjëhershme e presionit të gjakut
• Të fikët
• Rrahje të parregullta të zemrës

Secila nga këto simptoma mund të ketë pasoja serioze, ndaj nuk duhen neglizhuar, paralajmërojnë mjekët.

/Motilokal.com