
Aktiviteti sizmik që nisi të shtunën vazhdon ende në zonën detare midis ishujve Santorini dhe Amorgos.
Një tërmet me magnitudë 4.6 të shkallës Rihter u regjistrua dje në orën 19:44 nga rrjeti sizmologjik i Observatorit Kombëtar të Athinës, 233 kilometra në juglindje të Athinës, me epiqendër në det, pranë Amorgos.
Më herët, të paktën gjashtë lëkundje mbi magnitudën 4,0 u regjistruan midis orës 09:36 dhe 11:29 të së hënës, me më të madhin prej 4.9 Rihter në orën 11:29, me epiqendër 25 kilometra në jugperëndim të Amorgos. Po ashtu, një tjetër tërmet me magnitudë 4.9 Rihter u regjistrua në orën 14:17, me epiqendër 18 kilometra në jug jugperëndim të Arkesinit, Amorgos.
Sipas Athanasios Ganas, drejtor i Kërkimeve në Institutin Gjeodinamik të Observatorit Kombëtar të Athinës, kjo sekuencë sizmike ka një origjinë tektonike dhe lidhet me aktivitetin vullkanik, i cili nisi më 2 gusht 2024 me një zgjerim të ngadaltë të vullkanit. Ai konfirmoi se kompleksi vullkanik Thera-Kolumbo është nën monitorim të vazhdueshëm për të gjitha skenarët e mundshëm.
Për shkak të aktivitetit të vazhdueshëm sizmik, shkollat në Santorini, Anafi, Ios dhe Amorgos do të qëndrojnë të mbyllura deri të premten. Komitetet e monitorimit raportuan se aktiviteti sizmik në afërsi të ishullit Anydros ka qenë veçanërisht intensiv, me mbi 200 tërmete mbi magnitudën 3,0 të shkallës Rihter që nga e shtuna, 1 shkurt.
Ndërkohë, linja ajrore "SKY Express" ka shtuar fluturimet për dhe nga Santorini më 3 dhe 4 shkurt për të lehtësuar transportin e njerëzve. Kompania e trageteve "Attica Group" gjithashtu ka shtuar një udhëtim shtesë nga Santorini dhe po shqyrton mundësinë e ndryshimeve të mëtejshme në itineraret e saj për të forcuar lidhjet me Pireun.
/Motilokal.com