Mijëra banorë janë larguar nga Santorini pasi qindra tërmete u regjistruan pranë ishullit grek në 48 orët e fundit.

Rreth 9,000 njerëz janë larguar nga ishulli që nga e diela, dhe fluturime shtesë emergjente do të nisen të martën.

Më shumë se 300 tërmete janë regjistruar pranë ishullit në dy ditët e fundit dhe disa ekspertë thonë se lëkundjet mund të zgjasin për javë të tëra. Autoritetet kanë mbyllur shkollat dhe kanë paralajmëruar kundër tubimeve të mëdha në ambiente të mbyllura, por kryeministri Kyriakos Mitsotakis ka bërë thirrje për qetësi.

Santorini është një destinacion popullor turistik, por shumica e atyre që shkojnë janë vendas, pasi shkurti është sezoni turistik jashtë pikut.

Dhjetëra tërmete u regjistruan në Detin Egje në verilindje të Santorinit të martën, me një tërmet të fortë me magnitudë 5 ballë të shkallës Rihter që goditi mesditën e së martës.

Aktiviteti disaditor i vazhdueshëm sizmik ka bërë që disa banorë të flenë në makinat e tyre nga frika e kalimit të natës në shtëpitë e tyre në rast se muret apo tavanet shemben.

Deri më tani nuk janë raportuar dëme të mëdha në ishull, por masat emergjente po merren si masë paraprake.

Qindra njerëz u rreshtuan në port të martën herët në mëngjes për të hipur në një traget që shkonte në kontinent.

"Gjithçka është e mbyllur. Askush nuk po punon tani. I gjithë ishulli është zbrazur", tha një 18-vjeçar banor vendas për agjencinë e lajmeve Reuters përpara se të hipte në varkë.

Mediat lokale raportuan se rreth 6,000 njerëz ishin larguar nga ishulli me traget që nga e diela, dhe një shtesë prej 2,500 deri në 2,700 pasagjerë do të fluturojnë nga Santorini në Athinë me aeroplan të hënën dhe të martën, sipas Aegean Airlines.

Linja ajrore tha se kishte shtuar nëntë fluturime emergjente në orarin e saj me kërkesë të Ministrisë së Krizave Klimatike dhe Mbrojtjes Civile.

Ishulli i vogël grek ka një popullsi prej rreth 15,500 banorësh dhe pret miliona turistë çdo vit, kryesisht gjatë verës.

/Motilokal.com