Shkencëtari i njohur i Tokës, prof. dr. Naci Görür, ka paralajmëruar se një tërmet i mundshëm në rajonin e Marmarës mund të ketë pasoja shkatërrimtare për ekonominë e Turqisë. Ai gjithashtu theksoi se Bursa mund të goditet në të ardhmen nga një tërmet me magnitudë 7 ballë të Rihterit.

Në një intervistë të fundit, ai nënvizoi se shkatërrimi i ekonomisë së Marmarës do të kishte ndikim të drejtpërdrejtë në stabilitetin e vendit, duke e çuar Turqinë drejt një krize të thellë politike dhe ekonomike.

“Nëse ekonomia e Marmarës shkatërrohet, Turqia do të bjerë. Do të humbasim pavarësinë tonë politike dhe ekonomike”, paralajmëroi ai.

Një tjetër shqetësim i ngritur nga profesori është rreziku që vjen nga ndërtimet e pasigurta. Ai theksoi se Bursa mund të bëhet një qytet rezistent ndaj tërmeteve brenda 10 vjetëve, por vetëm nëse qytetarët dhe autoritetet veprojnë me shpejtësi dhe koordinim.

“Ne nuk e bëmë Stambollin rezistent ndaj tërmeteve për 25 vjet, por Bursa mund ta arrijë këtë brenda 10 vjetëve ose edhe më shpejt,” shtoi ai.

Pozicioni gjeologjik i Bursës e bën atë të rrezikuar

Sipas Görür, Bursa ndodhet mbi degën jugore të zonës së pllakave tektonike të Anadollit të Veriut, çka e bën të ekspozuar ndaj tërmeteve të fuqishme. Për më tepër, struktura e tokës në zonat fushore të qytetit është e dobët dhe përmban ujëra nëntokësore, gjë që mund të amplifikojë dëmet gjatë një tërmeti.

Ai theksoi nevojën për rritjen e ndërgjegjësimit dhe përdorimin e sistemeve ekzistuese për të përgatitur qytetet ndaj fatkeqësive natyrore. Sipas tij, nuk ka nevojë për investime të mëdha për të ndërtuar qytete rezistente ndaj tërmeteve; hapi i parë është veprimi konkret në terren.

Görür sugjeroi krijimin e një ekipi koordinues për të monitoruar dhe menaxhuar infrastrukturën e qytetit, si dhe për të përfshirë qytetarët në mbikëqyrjen e procesit. Ai theksoi rëndësinë e angazhimit të komunitetit, duke i inkurajuar njerëzit të veprojnë si pronarë të sigurisë së tyre.

Nëse këto masa nuk merren, ai paralajmëroi se Turqia mund të përballet me një katastrofë sizmike të pakontrollueshme. Për këtë arsye, ai apeloi për bashkëpunim të gjerë dhe veprim të menjëhershëm për të siguruar një të ardhme më të sigurt.

Tërmeti i fundit shkatërrues në Turqi

Turqia u godit për herë të fundit nga një tërmet i fuqishëm më 6 shkurt 2023, me magnitudë 7.8. Ky tërmet shkaktoi mbi 50 mijë viktima në Turqi dhe dëme të konsiderueshme edhe në Siri, duke çuar numrin e përgjithshëm të viktimave në mbi 57 mijë.

/Motilokal.com