Ndërmarrja Publike Lokale “Gjelbër” ka ndërmarrë një hap të rëndësishëm drejt rritjes së efikasitetit përmes investimit në makineri moderne. Këshilltari i Përgjithshëm dhe Sekretari Korporativ i kësaj ndërmarrjeje, Andi Belegu, tha se ky përmirësim teknik synon t’i shërbejë më mirë qytetit dhe të rrisë cilësinë e mirëmbajtjes së hapësirave publike.
Megjithatë, Belegu theksoi se përpjekjet e ndërmarrjes po pengohen nga ulja e buxhetit për gjelbërim nga qeveria komunale, gjë që po ndikon drejtpërdrejt në pamjen dhe shëndetin e kryeqytetit.
“Punëtorët tanë janë të përkushtuar dhe punojnë çdo ditë me zell, por pa mbështetjen e duhur institucionale, rezultatet mbesin të kufizuara”, u shpreh ai.
Sipas Belegut, Prishtina meriton më shumë përkushtim ndaj hapësirës publike, më shumë lule, më shumë pemë dhe më shumë dashuri për ambientin që na rrethon.
/Motilokal.com
