Disa mace njihen për mjaullimat e tyre, ndërsa të tjerat mund të jenë plotësisht të heshtura dhe nëse keni një kafshë shtëpiake "që flet shumë", është e rëndësishme të dalloni se çfarë po përpiqet t'ju tregojë.

Ekspertja e sjelljes së maceve, Amanda Campion, shpjegoi se çfarë fshihet pas kësaj sjelljeje.

"Macet siameze dhe orientale janë të njohura për vokalizimet e tyre, kështu që nëse i keni këto kafshë shtëpiake, prisni shumë 'të flasin'", pohon ajo.

Një arsye tjetër pse macet mjaullijnë është për të kërkuar vëmendje.

"Macet do t'ju njoftojnë me zërat e tyre nëse janë të uritura, të vetmuara ose të mërzitura. Mjaullima mund të jetë gjithashtu rezultat i një rutine të prishur. Përveç kësaj, parashikueshmëria është e rëndësishme për macet. Nëse humbisni kohën e vaktit ose të lojës, ato patjetër do t'ju njoftojnë", shpjegoi Campion.

Eksperti paralajmëroi se vokalizimi i papritur mund të jetë shenjë stresi ose sëmundjeje, dhe nëse një mace përndryshe e qetë fillon papritmas të mjaullijë shpesh, rekomandohet një vizitë te veterineri për të përjashtuar problemet shëndetësore.

Tek macet më të moshuara, mjaullima mund të shoqërohet me rënie të aftësive njohëse, si pasojë macet bëhen më të hutuara, më të izoluara dhe më të ndjeshme ndaj ndarjes.

Shoqata Amerikane për Mbrojtjen e Kafshëve pohon se macet mjaullijnë për një sërë arsyesh, të tilla si dëshira për të përshëndetur, kërkimi i vëmendjes, dëshira për ushqim, kërkimi i daljes ose hyrjes dhe gjatë sezonit të çiftëzimit për të tërhequr një partner.

Për të zvogëluar mjaullimat e panevojshme, rekomandohet një rutinë e vazhdueshme ushqyerjeje në të njëjtën kohë, duke injoruar mjaullimat e padëshiruara dhe duke siguruar qasje në një hapësirë të jashtme.

/Motilokal.com