Të paktën tre persona rezultojnë të zhdukur në një fshat malor në jug të Nju Meksikos, një vendpushim i njohur veror, pasi shirat musonë shkaktuan përmbytje të menjëhershme të martën. Përmbytjet ishin aq të fuqishme, sa një shtëpi u përfshi plotësisht nga rrjedha e lumit.

Ekipet e emergjencës kryen të paktën 85 operacione shpëtimi nga uji i rrëmbyeshëm në zonën e Ruidoso-s, përfshirë persona të bllokuar në shtëpitë dhe makinat e tyre, tha Danielle Silva nga Departamenti i Sigurisë Kombëtare dhe Menaxhimit të Emergjencave të Nju Meksikos.

Nuk u raportuan menjëherë viktima, por Silva theksoi se shkalla e shkatërrimit do të dihet vetëm pasi uji të tërhiqet.

“E dinim që do të kishim përmbytje… por kjo na goditi më fort se sa prisnim”, tha kryetarja e bashkisë së Ruidoso-s, Lynn D. Crawford, gjatë një deklarate në radio të martën në mbrëmje.

Crawford bëri të ditur se disa persona u dërguan në spital, megjithëse numri i saktë ende nuk është konfirmuar. Ajo inkurajoi banorët të telefonojnë linjat emergjente nëse kanë persona të afërt apo fqinj të zhdukur.

Kjo tragjedi ndodhi vetëm disa ditë pas përmbytjeve të mëdha në Teksas, ku humbën jetën mbi 100 persona dhe më shumë se 160 rezultojnë të zhdukur.

Në Nju Meksiko, autoritetet i bënë thirrje banorëve të kërkonin vende më të larta të martën pasdite, ndërsa niveli i ujit të lumit Rio Ruidoso u rrit gati 5 metra për shkak të reshjeve të dendura. Shërbimi Kombëtar i Motit lëshoi paralajmërime për përmbytje për zonën, e cila ishte zhveshur nga bimësia si pasojë e zjarreve të fundit.

Një matës përmbytjesh dhe një kamerë video treguan ujërat e trazuara të Rio Ruidoso-s që tejkalonin brigjet e lumit dhe përhapeshin në pyjet përreth. Rrugë dhe ura u mbyllën si masë sigurie.

Kaitlyn Carpenter, një artiste nga Ruidoso, tregoi se po udhëtonte me motor të martën pasdite kur stuhia u përkeqësua dhe u strehua pranë lumit në kompaninë e birrës “Downshift” së bashku me rreth 50 persona të tjerë. Ajo filloi të filmonte mbeturinat që rridhnin poshtë lumit dhe pa një shtëpi duke kaluar, me një derë ngjyrë bruz që i dukej e njohur, ishte shtëpia e familjes së një shoqeje të ngushtë të saj.

Fatmirësisht, familja nuk ndodhej në shtëpi në atë moment dhe është e sigurt, konfirmoi ajo.

“Kam qenë në atë shtëpi, kam kujtime aty... ta shihja duke rrëshqitur në lumë ishte shumë zemërthyese”, tha Carpenter. “Nuk mund ta besoja.”

Kryetarja e bashkisë tha gjithashtu se kishte raportime për kuaj të ngordhur pranë pistës së garave në qytet.

Dy ekipe shpëtimi të Gardës Kombëtare dhe disa ekipe lokale ndodheshin në zonë kur përmbytjet filluan, ndërsa pritet mbërritja e forcave shtesë.

Zona është veçanërisht e ndjeshme ndaj përmbytjeve që nga vera e vitit 2024, kur zjarret South Fork dhe Salt përfshinë pyjet e thata dhe shkatërruan rreth 1,400 shtëpi dhe struktura. Banorët ikën për t’i shpëtuar flakëve, për t’u përballur më pas me përmbytjet intensive.

Të paktën një person është raportuar i vdekur në Nju Meksiko, ndërsa dy zjarre të tjera janë aktive pranë komuniteteve lokale, sipas zyrtarëve.

“Uji këtë vit dukej më i lartë se në verën e kaluar”, tha Silva. “Ka një sasi të madhe uji që rrjedh në shumë zona madje edhe në vendet që nuk ishin përmbytur më parë.”

Matt DeMaria, meteorolog në Shërbimin Kombëtar të Motit në Albuquerque, sqaroi se stuhitë u formuan mbi terrenet e djegura nga zjarret e vitit të kaluar. Toka e djegur nuk mund të përthithte shiun, kështu që uji rridhte shpejt drejt lumit.

Matjet paraprake tregojnë se niveli i lumit Rio Ruidoso arriti mbi 20 metra një rekord nëse konfirmohet dhe filloi të binte të martën në mbrëmje.

Tre strehimore janë hapur për banorët që nuk mund të kthehen në shtëpi.

Pamjet i sollën kujtime të dhimbshme Carpenter-it, studioja e së cilës ishte shkatërruar nga një përmbytje vitin e kaluar. Ajo përshkroi atmosferën: ajri mbante erë benzine dhe dëgjoheshin përplasje të fuqishme ndërsa lumi rrëzonte pemët.

“Është vërtet e frikshme”, tha ajo.

Cory State, i cili punon në “Downshift Brewing Company”, priti dhjetëra banorë ndërsa lumi u fry dhe breshëri godiste xhamat. Shtëpia që kalonte para tyre “ishte vetëm një nga shumë imazhet shkatërruese të kësaj dite”, tha ai.

/Motilokal.com