Hulumtime të reja kanë treguar se ndotja dhe ilaçet tradicionale bimore mund të kontribuojnë në kancerin e mushkërive tek njerëzit që nuk përdorin fare duhan ose e përdorin atë shumë rrallë.

Kanceri i mushkërive është konsideruar prej kohësh një sëmundje e duhanpirësve, por ndërsa përdorimi i duhanit ka rënë në shumë pjesë të botës, është shfaqur një problem shqetësues: kanceri i mushkërive tek njerëzit që nuk kanë pirë kurrë duhan është në rritje. Ky lloj kanceri prek gratë, veçanërisht ato me prejardhje aziatike, dhe është më i zakonshëm në vendet e Azisë Lindore sesa në vendet perëndimore.

Hulumtimi, i botuar në revistën profesionale Nature, u drejtua nga studiues të Universitetit të Kalifornisë, San Diego dhe Institutit Kombëtar të Kancerit (NCI), i cili është pjesë e Instituteve Kombëtare të Shëndetit (NIH).

"Kemi vënë re këtë trend shqetësues që njerëzit që nuk kanë pirë kurrë duhan po preken më shpesh nga kanceri i mushkërive, por nuk e kuptuam pse. Hulumtimi ynë tregon se ndotja e ajrit është e lidhur ngushtë me të njëjtat lloje mutacionesh të ADN-së që zakonisht i shoqërojmë me pirjen e duhanit", tha një nga autorët e studimit, Ludmil Alexandrov.

Maria Teresa Landi, e cila është gjithashtu një nga autoret e studimit të lartpërmendur, tha se shumica e studimeve të mëparshme mbi kancerin e mushkërive nuk i ndanin të dhënat nga duhanpirësit nga jo-duhanpirësit, gjë që kufizonte njohuritë mbi shkaqet e mundshme të kësaj sëmundjeje.

"Ne e hartuam studimin për të mbledhur të dhëna nga njerëz që nuk kishin pirë kurrë duhan dhe për të përdorur gjenomikën për të ndjekur se cilat ekspozime mund të shkaktojnë këto kancere", shtoi ajo.

/Motilokal.com