Dy persona kanë humbur jetën dhe më shumë se 1000 të tjerë janë evakuuar në Korenë e Jugut, pasi vendi u përfshi nga reshje të dendura shiu të enjten, njoftoi Ministria e Brendshme dhe e Sigurisë.

Që nga ora 11:00 të së enjtes, disa pjesë të rajonit Chungcheong Jugor, në jug të kryeqytetit Seul, kishin regjistruar mbi 400 milimetra shi që nga dita e mërkurë. Sipas Administratës Meteorologjike të Koresë, reshjet përbëjnë një rekord për këtë zonë, ndërsa parashikohet që moti të përkeqësohet edhe më tej gjatë natës.

Autoritetet ngritën në nivelin më të lartë alarmin për rrëshqitje dheu në disa rajone, përfshirë Chungcheong, teksa shirat e rrëmbyeshëm vazhduan me intensitet të lartë, sipas Shërbimit Pyjor të Koresë.

Në qytetin Gwangju, rreth 267 kilometra në jug të Seulit, përmbytjet goditën 87 rrugë dhe 38 ndërtesa brenda vetëm dy orësh, pasi u lëshuan paralajmërimet për reshje ekstreme, raportoi Agjencia e Lajmeve Yonhap.

Ndërkohë, Ministria e Arsimit bëri të ditur se rreth 403 shkolla u mbyllën për shkak të kushteve ekstreme, ndërsa 166 shkolla të tjera raportuan dëme materiale nga stuhia.

/Motilokal.com