Një incident ajror me potencial katastrofik është regjistruar mbi hapësirën ajrore të Republikës së Tuvas, një rajon malor në Siberinë jugore, pranë kufirit me Mongolinë.
Dy aeroplanë kinezë, një pasagjerësh i kompanisë Air China dhe një transportues mallrash i SF Airlines – janë gjendur në një distancë alarmuese nga njëri-tjetri, duke rrezikuar një përplasje frontale që mund të kishte rezultuar fatale për qindra njerëz.
Fluturimi i Air China me numër CA967 ishte nisur nga aeroporti i Shangait (Pudong) drejt Milanos (Malpensa), një itinerar që zakonisht mbart një numër të madh pasagjerësh europianë dhe italianë. Ndërkohë, aeroplani cargo i SF Airlines, me numrin O3-128, po udhëtonte nga Budapesti për në qytetin Ezhou të Kinës.
Sipas të dhënave paraprake, dy aeroplanët u afruan në një distancë vertikale prej vetëm 90 deri në 120 metrash, ndjeshëm më pak se distanca e rekomanduar e sigurisë, e cila në raste të tilla duhet të jetë disa qindra metra. Dyshohet se fluturimi i Air China ndryshoi lartësinë pa lejen e kontrollit të trafikut ajror rus.
Për fat të mirë, falë reagimit të shpejtë të pilotëve dhe kontrollorëve të trafikut ajror, përplasja u shmang në sekondat e fundit. Autoritetet ruse dhe kineze kanë nisur hetimet për të zbardhur nëse incidenti ishte pasojë e një gabimi njerëzor apo defekti teknologjik.
/Motilokal.com
