Ndryshimet klimatike nuk po sjellin vetëm temperatura më të larta, por edhe kërcënime të reja për shëndetin. Një prej tyre është përhapja gjithnjë e më e gjerë e baktereve Vibrio në ujërat e deteve evropiane, një grup bakteresh që mund të shkaktojnë infeksione të rënda, sidomos kur konsumohen fruta deti të pagatuara mirë ose përmes kontaktit me ujë të ndotur.

Sipas Qendrës Evropiane për Parandalimin dhe Kontrollin e Sëmundjeve (ECDC), rritja e temperaturave në sipërfaqet ujore gjatë verës po krijon kushte të favorshme për shumëzimin e këtyre baktereve, veçanërisht në ujërat bregdetare me kripësi të ulët.

Çfarë është vibrioza?

Vibrioza është një infeksion i shkaktuar nga bakteret Vibrio, të cilat jetojnë natyrshëm në ujëra të ngrohta, të kripura ose të përziera me ujë të ëmbël. Këto baktere mund të futen në trup përmes konsumit të frutave të detit të pagatuar, ose përmes plagëve të hapura që bien në kontakt me ujin e kontaminuar.

Infeksioni mund të variojë nga një gastroenterit i lehtë deri në sëmundje të rënda, si infeksione të indeve, sepsë dhe në raste ekstreme, vdekje.

Tre llojet më problematike në Evropë:

• Vibrio parahaemolyticus – shpesh shkakton simptoma gastrointestinale si diarre, nauze dhe dhimbje barku.
• Vibrio vulnificus – shumë i rrezikshëm për individët me sistem të dobët imunitar; mund të shkaktojë infeksione të gjakut, nekrozë dhe vdekje.
• Vibrio cholerae – i njohur për shkaktimin e kolerës, por edhe për forma të tjera të rënda infeksioni.

Rritja e rasteve në Evropë

Rritja e temperaturave ka bërë që këto baktere të shfaqen gjithnjë e më shpesh në detet veriore të Evropës, si Deti Baltik dhe Deti i Veriut. Në këto rajone, kripësia e ulët dhe uji i ngrohtë krijojnë terren ideal për Vibrio-n. ECDC paralajmëron se me vazhdimin e ngrohjes globale, përhapja e baktereve do të zgjerohet edhe në rajone të tjera bregdetare.

Si transmetohet infeksioni?

Bakteret Vibrio mund të hyjnë në trup në dy mënyra kryesore:

• Përmes ushqimit – sidomos me fruta deti të pagatuara ose të gatuara dobët.
• Përmes lëkurës së dëmtuar – kur plagët ose prerjet ekspozohen në ujëra të ndotura, mund të ndodhë infeksion lokal, që në disa raste përparon në infeksion sistemik.

Individët me sëmundje të mëlçisë, diabet ose sistem të dobët imunitar janë më të rrezikuarit.

Si ta dalloni vibriozën?

Simptomat varen nga mënyra e infektimit:

Nga konsumimi i ushqimit të kontaminuar:

• diarre e ujshme
• dhimbje barku
• nauze dhe të vjella
• ethe dhe të dridhura

Nga kontakti me ujë përmes plagëve:

• skuqje e lëkurës
• ënjtje dhe dhimbje rreth plagës
• në raste të patrajtuara: nekrozë, infeksione të gjakut, sepsë, apo edhe amputim.

Çfarë mund të bëni për t’u mbrojtur?

• Shmangni konsumimin e frutave të detit të gjalla ose të pagatuara mirë. Gatuajini gjithmonë mirë, veçanërisht midhjet, gaforret dhe kallamarët.
• Nëse keni plagë të hapura ose gërvishtje, shmangni larjen në ujëra detare ose lagunore. Në raste të domosdoshme, mbulojeni me fasha të papërshkueshme nga uji.
• Nëse ekspozoheni ndaj ujit ndërsa keni plagë, pastroni menjëherë zonën me ujë të pastër dhe të ftohtë.

/Motilokal.com