Turizmi në vend ka njohur një rritje të dukshme gjatë muajit qershor 2025, sipas të dhënave të publikuara nga INSTAT, duke reflektuar një sezon të suksesshëm për sektorin e akomodimit.

Hotelet raportuan një rritje të ndjeshme të fluksit të turistëve dhe netëqëndrimeve, ku kryesuan vizitorët nga Kosova me 19% të totalit dhe nga Italia me 13%.

Sipas raportit mujor të INSTAT mbi strukturat akomoduese, numri i përgjithshëm i vizitorëve u rrit me 37,2% krahasuar me qershorin e kaluar. Nga këta, vizitorët e huaj (jo-rezidentë) u rritën me 37,4%, ndërsa vizitorët vendas (rezidentë) me 36,7%.

Edhe netëqëndrimet, një tregues kyç i aktivitetit turistik, shënuan një rritje prej 38,2% në total, ku turistët e huaj patën një rritje prej 38,3% dhe ata vendas me 38,0%.

Të dhënat tregojnë se zonat bregdetare patën rritjen më të lartë të vizitorëve të huaj, me +42,4%, ndërsa hotelet dhe akomodimet e ngjashme u rritën me 35%.

Në renditjen sipas vendeve të origjinës, Kosova kryeson me 19% të turistëve të huaj, e ndjekur nga Italia me 13%, Polonia me 10%, Gjermania me 8% dhe Franca me 6%, ndërsa 44% e vizitorëve vijnë nga vende të tjera të botës.

Një tjetër tregues pozitiv është norma e shfrytëzimit të dhomave në hotele, e cila arriti në 39,5%, nga 35,9% që ishte në qershor 2024, dëshmi e qartë e përmirësimit të performancës në sektorin e turizmit dhe mikpritjes.

Këto shifra konfirmojnë trendin rritës të turizmit hyrës në Shqipëri, veçanërisht nga tregjet kryesore të rajonit dhe Evropës, duke e forcuar gjithnjë e më shumë pozicionin e vendit si një destinacion i preferuar për pushime.

/Motilokal.com