Një ngjarje dramatike ka tronditur Norvegjinë, ku një rrëshqitje gjigante dheu përfshiu një sipërfaqe prej rreth 100 mijë metrash katrorë, e barabartë me afro 14 fusha futbolli, duke e rrëzuar të gjithë territorin drejt detit.

Pamjet e publikuara tregojnë momentet kur toka u shkëput me forcë nga gadishulli dhe, me shpejtësi të madhe, u përmbys në ujë, duke marrë me vete gjithçka që gjendej mbi të.

Mes rrëshqitjes u përfshinë disa shtëpi banimi, të cilat u shembën e u zhdukën nën det brenda pak sekondash. Fatmirësisht, nuk ka raportime për viktima njerëzore, pasi autoritetet kishin urdhëruar evakuimin e banorëve, duke reaguar shpejt ndaj shenjave të hershme të lëvizjes së tokës.

Ekspertët e konsiderojnë këtë si një nga rrëshqitjet më të mëdha të dheut të regjistruara në Norvegji vitet e fundit. Shkaku mendohet të jetë një kombinim i reshjeve të dendura të shiut dhe natyrës së tokës së zonës, e cila është e ndjeshme ndaj erozionit.

Autoritetet lokale vijojnë të monitorojnë terrenin për rrezikun e një tjetër rrëshqitjeje, ndërsa ekipet e emergjencës po punojnë për të vlerësuar dëmet dhe për të shpëtuar gjithçka që mund të jetë e sigurt në afërsi të zonës së prekur.

Ngjarja ka ngjallur debat të gjerë në opinionin publik norvegjez mbi masat parandaluese dhe nevojën për strategji më të forta mbrojtjeje ndaj fatkeqësive natyrore.

/Motilokal.com