Turizmi në Shqipëri vazhdon të jetë një prej motorëve kryesorë të ekonomisë kombëtare, duke tërhequr çdo vit një numër gjithnjë e më të madh vizitorësh të huaj.

Të dhënat më të fundit të Bankës së Shqipërisë tregojnë se vetëm në gjashtëmujorin e parë të vitit 2025, turistët e huaj kanë shpenzuar rreth 2,1 miliardë euro në vend, çka përfaqëson një rritje prej 7,7% krahasuar me të njëjtën periudhë të vitit të kaluar.

Këto shpenzime përbëjnë një burim të rëndësishëm të ardhurash për ekonominë shqiptare, duke e konsoliduar turizmin si një sektor strategjik për zhvillimin e qëndrueshëm të vendit.

Sipas INSTAT, në gjysmën e parë të vitit, Shqipëria ka pritur mbi 4,7 milionë vizitorë të huaj, rreth 5% më shumë se një vit më parë. Përveç plazheve dhe klimës mesdhetare, vizitorët tërhiqen edhe nga zonat malore me natyrë të paprekur, qytetet me trashëgimi historike e kulturore, si dhe mikpritja e veçantë e shqiptarëve dhe kuzhina tradicionale.

Në të njëjtën kohë, edhe udhëtimet e shqiptarëve jashtë vendit janë shtuar. Raporti i Bankës së Shqipërisë “Bilanci i Pagesave” tregon se shpenzimet e tyre gjatë kësaj periudhe arritën në 1,3 miliardë euro, me një rritje vjetore prej 7,5%.

Megjithatë, bilanci i udhëtimeve vijon të jetë pozitiv: të ardhurat nga turistët e huaj tejkalojnë shpenzimet e shqiptarëve jashtë, duke gjeneruar një suficit prej rreth 800 milionë eurosh, një tregues i qartë i rolit eksportues të turizmit shqiptar.

Turizmi tashmë nuk kufizohet vetëm në sezonin veror, por po shtrihet gjatë gjithë vitit, duke gjeneruar të ardhura të qëndrueshme dhe duke forcuar imazhin e Shqipërisë si një destinacion i gjithanshëm dhe afatgjatë.

/Motilokal.com