Filipinet dhe Tajvani kanë pezulluar mësimet dhe punën në zyrat qeveritare në disa provinca të hënën, ndërsa Aeroporti i Hong Kongut po shqyrton ndërprerjen e operacioneve për 36 orë, për shkak të afrimit të Super Tajfunit Ragasa.

Në kryeqytetin Manila dhe në shumë provinca të tjera, shkollat në të gjitha nivelet dhe puna jo-thelbësore qeveritare janë pezulluar. Po ashtu, disa fluturime janë anuluar për shkak të erërave të fuqishme dhe reshjeve të dendura, raportoi gazeta lokale Inquirer.

Sipas parashikimeve, tajfuni pritet të kalojë afër ose të godasë ishullin Babuyan. Rreth 10.061 persona janë “evakuuar paraprakisht” nga zonat me rrezik të lartë në Luzonin Verior dhe Qendror, bëri të ditur Manila Bulletin. Stuhia pritet të largohet nga Zona e Përgjegjësisë Filipinase deri të martën.

Në Tajvan, Drejtoria e Përgjithshme e Administrimit të Personelit anuloi punën dhe mësimet në qarqet Pingtung, Hualien dhe Taitung. Të gjitha fluturimet drejt ishujve periferikë pas mesditës u anuluan, ndërsa 88 shërbime tragetesh në 13 linja u pezulluan, sipas Focus Taiwan.

Ndërkohë, Autoriteti i Aeroportit të Hong Kongut po shqyrton mundësinë e mbylljes së terminalit, për shkak të “kërcënimeve serioze” nga Ragasa, i cili parashikohet të sjellë erëra me forcë uragani deri në 220 km/h në ditët e ardhshme, shkruan South China Morning Post.

Në Kinë, Byroja e Menaxhimit të Emergjencave në Shenzhen njoftoi të dielën se po përgatitet për evakuimin e rreth 400 mijë banorëve që jetojnë në zona të rrezikuara nga përmbytjet.

/Motilokal.com