Në Evropë, një në pesë vdekje të lidhura me sëmundjet kardiovaskulare mund të shmangeshin nëse do të zvogëloheshin rreziqet mjedisore, siç janë ndotja e ajrit, temperaturat ekstreme dhe ekspozimi ndaj kimikateve të dëmshme.

Siç paralajmëroi Agjencia Evropiane e Mjedisit, “në Bashkimin Evropian, sëmundjet kardiovaskulare janë shkaku kryesor i vdekjes: më shumë se 1.7 milion njerëz vdiqën në vitin 2022”, që do të thotë se një e treta e vdekjeve ishin për shkak të këtyre sëmundjeve, raportoi EEA.

Të paktën 18% e këtyre vdekjeve shkaktohen nga faktorë mjedisorë: rreth 130,000 njerëz vdesin çdo vit për shkak të ndotjes nga grimcat e imëta dhe 115,000 për shkak të të ftohtit ose të nxehtit ekstrem.

Për më tepër, të paktën 6 milionë raste të reja të sëmundjeve kardiovaskulare diagnostikohen çdo vit, me një kosto totale për Evropën prej 282 miliardë eurosh.

Për EEA-në, këto vdekje janë të parandalueshme nëpërmjet “ndërhyrjeve dhe politikave”. “Është thelbësore që t’i adresojmë ato”, shtoi ai.

BE-ja “është tashmë në rrugën e duhur për të arritur qëllimin e saj për zbatimin e planit të veprimit për ndotje zero dhe uljen e vdekjeve të parakohshme që i atribuohen ndotjes së ajrit me 55% deri në vitin 2030 krahasuar me vitin 2005”, thotë EEA, një agjenci me seli në Kopenhagen. Megjithatë, duhet bërë më shumë, duke përfshirë rritjen e ndërgjegjësimit për rreziqet kardiovaskulare që lidhen me faktorët mjedisorë, uljen e ndotjes akustike nga transporti dhe forcimin e rregulloreve mbi përdorimin e kimikateve.

/Motilokal.com