Banorët e veriperëndimit të Paqësorit në SHBA dhe Kanadasë perëndimore po përgatiten për përmbytje që mund të kërcënojnë jetën, pasi shirat e rrëmbyeshëm që kanë zgjatur për disa ditë kanë fryrë lumenj dhe degë të shumta.

Qendra Kombëtare e Ujit raportoi përmbytje të mëdha përgjatë lumenjve Skagit dhe Snohomish në shtetin e Uashingtonit të enjten.

Në Kanada, autostradat kryesore drejt Vankuverit janë mbyllur për shkak të përmbytjeve dhe rrezikut të ortekëve.

Urdhrat e evakuimit janë në fuqi për mijëra njerëz në SHBA dhe Kanada, dhe autoritetet kanë paralajmëruar për rrezikun e reshjeve të mëtejshme.

Guvernatori i shtetit të Uashingtonit, Bob Ferguson, ka shpallur gjendje të jashtëzakonshme dhe rreth 100,000 banorë mund të përballen me urdhër evakuimi.

Në shpalljen e gjendjes së jashtëzakonshme, u paralajmërua se shiu, dhe ndoshta bora në lartësitë malore, mund të përkeqësonin përmbytjet.

Guvernatori Ferguson tha se nuk kishte raportime për vdekje, por paralajmëroi banorët se rreziku nuk kishte mbaruar.

"Për shembull, në lumin Skagit, niveli i lumit do të arrijë kulmin nesër në mes të mëngjesit. Pritet që ky nivel të jetë përsëri historik në atë lumë", tha ai për CNN të enjten në mbrëmje.

Më shumë se 30 autostrada u mbyllën në të gjithë shtetin dhe mbylljet prekën edhe udhëtarët në zonën e Siatëllit.

Përmbytjet prekën të gjithë Uashingtonin perëndimor, si dhe zonën më jugore përgjatë bregdetit të Oregonit.

/Motilokal.com