Disa marka duan të magjepsin dhe tërheqin klientët me teknologjinë që kemi parë në filmat fantastiko-shkencorë. Polestar 4 vendosi një trend duke hequr xhamin e pasmë dhe duke përdorur një brez të ri kamerash dhe ekranesh me rezolucion të lartë që markat e tjera duan të ndjekin.

Teknologjia kontroverse po nis një trend të ri në dizajnin e veturave. Shumë veta u habitën kur Polestar prezantoi modelin 4 të prodhimit, i cili, përveç përfshirjes së teknologjisë më të fundit, solli edhe një tipar interesant, por kontrovers, në dizajn.

Konkretisht, projektuesit e SUV-it elektrik të markës suedezo-kineze e kanë eliminuar plotësisht konceptin klasik të një xhami të pasmë. Në vend të kësaj, vetura ka më shumë fletë metalike dhe teknologji të përparuar kamerash dhe ekrani në mënyrë që shoferi të mund të shohë se çfarë po ndodh pas veturës.

Ky është një trend i ri dhe njëkohësisht një ide e guximshme dizajni që duket se po rritet, sepse e shohim edhe në marka të tjera. Heqja e xhamit të pasmë mund të duket e rrezikshme, pasi kompromenton dukshmërinë e shoferit nga mbrapa. Megjithatë, kjo nuk lihet në dorë të rastësisë, siç e ka treguar tashmë Polestar 4. Në vend të kësaj, përdoren kamera dhe ekrane me rezolucion të lartë, duke ofruar një pamje të qartë dhe të pakufizuar sikur të kishit xham klasik.

Cili është motivimi për këtë qasje? Raportohet se ka një numër përfitimesh shtesë nga kjo ide: projektuesit kanë më shumë liri për të rishqyrtuar të gjithë pjesën e pasme të automjetit, ata mund të përqendrohen më shumë në aerodinamikë, linja më të theksuara pa kompromise strukturore, si dhe në eliminimin e sipërfaqes së brishtë dhe të shtrenjtë të xhamit të pasmë.

Pas Polestar, i cili ka një kamerë HD me kënd të gjerë që transmeton një imazh të drejtpërdrejtë në një pasqyrë dixhitale të pasme, marka si Ferrari, Audi dhe Jaguar kanë filluar tashmë të ofrojnë vizionet e tyre për këtë filozofi të re dizajni.

Prototipet e tyre kanë tërhequr shumë vëmendje vitet e fundit, megjithëse modelet e tyre të ardhshme të prodhimit ende nuk janë zbuluar, kështu që nuk e dimë nëse ky koncept do të realizohet përfundimisht.

/Motilokal.com