Një stuhi e rrezikshme dimërore ka goditur Shtetet e Bashkuara të Amerikës (SHBA), duke vrarë të paktën tre persona. Sipas informacioneve të fundit të marra nga BBC, qindra mijëra familje janë pa energji elektrike.

Shkollat dhe rrugët në të gjithë SHBA-në janë mbyllur, dhe fluturimet janë anuluar.

Sipas të dhënave nga poweroutage.us, rreth 900,000 familje ishin pa energji elektrike që nga pasditja e së dielës. Ndërkohë, më shumë se 10,000 fluturime u anuluan, raporton FlightAware.

Reshjet e dendura të borës, breshëri dhe shiu i ngrirë mund të zgjasin me ditë.

“Bora dhe akulli do të shkrihen shumë ngadalë dhe nuk do të zhduken së shpejti, dhe kjo do të pengojë çdo përpjekje për rimëkëmbje”, tha për CBS News Allison Santorelli, një meteorologe në Shërbimin Kombëtar të Motit.

Departamenti i Shëndetësisë i Luizianës konfirmoi të dielën se dy burra kishin vdekur nga hipotermia.

Guvernatorja e shtetit të Nju Jorkut, Kathy Hochul, i paralajmëroi banorët të qëndrojnë brenda dhe të mos përdorin makinat e tyre.

Guvernatori i Kentucky-t, Andy Beshear, tha të dielën se shteti ka më shumë akull dhe më pak borë sesa ishte parashikuar fillimisht.

Meteorologët paralajmëruan se një nga rreziqet më të mëdha të stuhisë është akulli, i cili mund të dëmtojë pemët, të rrëzojë linjat e energjisë dhe t'i bëjë rrugët të pasigurta.

Pothuajse gjysma e shteteve kanë shpallur gjendje të jashtëzakonshme dhe shkollat në të gjithë vendin tashmë po anulojnë mësimet në pritje të vazhdimit të stuhisë të hënën. Senati i SHBA-së ka anuluar gjithashtu një votim të planifikuar për natën e së hënës.

/Motilokal.com