Uji që vlon dhe përgatitja e shpejtë e një pijeje të preferuar ndërsa vetura është në lëvizje ndoshta nuk tingëllon si ideja më e mençur. Por kjo nuk e ndaloi kompaninë gjermane Hertella të prodhonte dhe të reklamonte një aparat kafeje të projektuar posaçërisht për Volkswagen Buba.

Hertella Auto Kaffeemaschine mund të montohej drejtpërdrejt në panelin e përparmë të Bubës së vitit 1959, duke u dhënë pasagjerëve mundësinë të pinin një filxhan kafe të nxehtë sa herë të donin.

Dihet shumë pak për këtë aparat, përveç faktit se ishte në dispozicion në versione 6 dhe 12 volt dhe kushtonte 65 marka gjermane. Për krahasim, një Buba e re në Gjermani në vitin 1959 kushtonte 3.790 marka.

Mendohet se jo shumë pronarë e zgjodhën këtë luks për kafe gjatë vozitjes dhe se ishte më tepër një pajisje e destinuar për drejtues apo persona me pozita më të larta. Aparati qëndroi në treg vetëm për një kohë të shkurtër dhe më pas u zhduk, si shumë ide të çuditshme që koha i la pas.

Ky ishte i vetmi aparat kafeje i njohur në botë që montohej në panelin e veturës me një mbajtëse të thjeshtë, duke lejuar heqjen dhe pastrimin e shpejtë. I prodhuar posaçërisht për Bubën e fundviteve pesëdhjetë, sot, gati shtatë dekada më vonë, është pothuajse i zhdukur.

Megjithatë, kishte disa zgjidhje praktike. Kur kafeja ishte gati, ajo derdhej direkt në një filxhan porcelani me bazë metalike, i cili ngjitej me magnet në mbajtëse, duke shmangur derdhjen dhe duke mbrojtur brendësinë e veturës dhe rrobat e pasagjerëve. Funksionimi ishte i thjeshtë. Uji hidhej në perkolator, ndërsa kafeja në një ndarje të ngjashme me filtër, duke u përgatitur në mënyrë të ngjashme me çajin.

Aparati punonte sipas parimit klasik të zierjes së ujit dhe lidhej direkt në ndezësin e cigareve të veturës.

Sot, kërkimet në internet tregojnë shumë pak informacion për këtë produkt, përveç faktit që është jashtëzakonisht i rrallë. Nuk dihet nëse kjo ndodh sepse nuk pati interes në atë kohë, apo sepse rezultoi një ide jo e suksesshme.

Një pronar i një Bube të vitit 1959, i quajtur Dave, arriti të gjejë një model origjinal dhe e instaloi menjëherë. Ai shpjegon se aparati nuk kishte buton ndezjeje. Perkolatori i argjendtë hiqej dhe lidhej direkt në ndezësin e cigareve.

Nuk ka të dhëna për cilësinë e kafesë që prodhonte, por besohet se nuk ishte diçka e jashtëzakonshme. Në reklama thuhej se mund të përdorej edhe për çaj, ujë të nxehtë me limon, madje edhe për supë. Edhe pse, të gatuash supë gjatë vozitjes tingëllon më shumë si eksperiment sesa si nevojë reale.

/Motilokal.com